Շուշին դարձնենք տարածաշրջանի ամենագրավիչ զբոսաշրջային կենտրոնը. Սամվել Աղաջանյան

Շուշիի քաղաքապետի թեկնածու, ՀՅԴ անդամ Սամվել Աղաջանյանն «Ապառաժ»-ի հետ զրույցում ներկայացրել է իր թեկնածությունն առաջադրելու պատճառներն ու քաղաքում առկա խնդիրների լուծման իր տեսլականը:

Նրա խոսքով՝ հանդիսանալով հին մշակութային եւ կրթական կենտրոն, Շուշի քաղաքի սոցիալ-տնտեսական եւ հոգեւոր-մշակութային խնդիրները պետք է միշտ լինեն քաղաքային իշխանության ուշադրության առանցքային կենտրոնում:

Քաղաքապետի թեկնածուն նշել է, որ ՀՅԴ-ն, լինելով ապակենտրոն կուսակցություն, միշտ կողմ է եղել ՏԻՄ-ի լիազորությունների եւ պատասխանատվության ընդլայնմանը:

«Աշխարհասփյուռ կառույցների միջոցով ՀՅԴ-ն գործնական քայլեր է կատարում Շուշիի պատմամշակութային տեսքի վերականգնման ուղղությամբ»,- հավելել է նա :

«Նպատակ ունեմ աշխատանքներ տանել քաղաքի երբեմնի փառքը վերականգնելու ուղղությամբ՝  ստեղծելով տպագրատներ, թերթերի խմբագրություններ, գործարար մարդկանց ներդրումների միջոցով նաեւ՝  «Շուշի» հիմնադրամ»՝ Շուշին դարձնելով տարածաշրջանի ամենագրավիչ զբոսաշրջային կենտրոնը»,-խոսելով ծրագրային դրույթների մասին, ասել է նա:

Քաղաքապետի թեկնածուն կարեւորել է կայուն ջրամատակարարման ապահովումը եւ քաղաքի աղբահանման խնդիրների լուծումը:

Ստորեւ ներկայացնում ենք Սամվել Աղաջանյանի կենսագրությունն ու նախընտրական ծրագրի հիմնական կետերը.

Սամվել Բորիսի Աղաջանյանը ծնվել է 1975 թ. հոկտեմբերի 28-ին, Մարտակերտի շրջանի Մատաղիս գյուղում:

1993թ. ծառայության է անցել Շուշիի գնդում՝ որպես հետեւակի մարտական մեքենայի նշանառու-օպերատոր եւ ակտիվ մասնակցություն ունեցել  արցախյան գոյապայքարին: Ազատագրական մարտերի ժամանակ վիրավորվել եվ ստացել է 2-րդ կարգի հաշմանդամություն:

1995թ. Սամվել Աղաջանյանը ԱՀ նախագահի հրամանով պարգևատրվել է «Մարտական խաչ» 2-րդ աստիճանի շքանշանով, իսկ ՀՀ նախագահի հրամանագրով՝ «Մարտական ծառայություն» մեդալով:

1999 թ. նա աշխատել է Շուշիում գործող Երեւանի ոսկերչական գործարանի մասնաճյուղում՝ որպես պահեստապետ-ադմինիստրատոր, այնուհետեւ՝ որպես արտադրամասի պետ:

2003թ. ընդունվել եւ 2008թ. ավարտել է «Մեսրոպ Մաշտոց» համալսարանի պատմություն բաժինը:

Սամվել Աղաջանյանը ՀՅԴ անդամ է:

2010-2018թթ. աշխատել է «Արցախէներգո» ՓԲԸ-ի Շուշիի մասնաճյուղում՝ որպես իրացման բաժնի հսկիչ:

Երեք անգամ ընտրվել է Շուշիի քաղաքային համայնքի ավագանու անդամ:

Ամուսնացած է, ունի 2 որդի:

Նախընտրական ծրագրի հիմնական կետերը՝

-ավագանու ինստիտուտի լիարժեք և իրական կայացում,

-քաղաքապետարանի աշխատանքի ինքնուրույնության և արդյունավետության բարձրացում,

-բնակշահագործման տեղամասերի իրավասությունների վերանայում,

— Շուշիի պատմաճարտարապետական տեսքի վերականգնման քայլերի ձեռնարկում,

— կոմունալ պատշաճ սպասարկում,

-համայնքային սեփականության արդյունավետ եւ օբյեկտիվ կառավարում,

-բարեկարգ, լուսավոր եւ ընդգծված մաքուր բակեր եւ փողոցներ:

Հասմիկ Հակոբյան