Հանդիսավոր արարողությամբ կայացել է Ասկերանի ՀՅԴ պատանեկան ճամբարի փակումը
Հուլիսի 28-ին տեղի է ունեցել ՀՅԴ Զավարյան Ուսանողական Միության կողմից Արցախի Ասկերան քաղաքում կազմակերպված պատանեկան ճամբարի փակման արարողությունը:
Ճամբարի ավարտական հանդեսին ներկա էին ՀՅԴ Ասկերանի կոմիտեի ներկայացուցիչ Ալյոշա Գաբրիելյանը, Ասկերանի շրջվարչակազմի ղեկավար Գեղամ Բեգլարյանը, ասկերանցիներ, հյուրեր:
Պատանիները ներկաներին են ներկայացրել անցած շաբաթվա ընթացքում սովորած երգերը, պարերը, հանդես եկել ասմունքներով, թատերական և մարզական համարներով:
Ճամբարի ընդհանուր պատասխանատու Կիրո Գարավարդանյանը նշել է, որ Ասկերանի հյուրընկալ հարկի տակ անմոռանալի օրեր են անց կացրել՝ շնորհակալություն հայտնելով շրջանի ղեկավար կազմին և ՀՅԴ կառույցին աջակցության համար:
Ալյոշա Գաբրիելյանը կարևորել է Հայաստան-Արցախ-Սփյուռք եռամիասնությունը, որի շնորհիվ միայն կարող ենք նորանոր հաջողություններ արձանագրել պետական շինարարության գործում: «Ամռանը մեր երեխաները սրտի թրթիռով են սպասում Սփյուռքի մեր հայրենակիցների ժամանելուն, նրանց կազմակերպած ճամբարներին: Իսկ Սփյուռքի մեր հայրենակիցներն ողջ տարվա ընթացքում աշխատում են հոգալու նյութական և կազմակերպական հարցերը: Նրանց համար ամենամեծ հաշվետվությունն այսպիսի հաջողված ճամբարն է»,- իր խոսքում նշել է Ալյոշա Գաբրիելյանը:
Հավելենք, որ Լիբանանից ժամանած 5 հոգանոց խումբն առաջիկա շաբաթվա ընթացքում կշարունակի աշխատանքը՝ այս անգամ Ասկերանի ՀՅԴ պատանեկան միության անդամների հետ:
