Թուրքիայի Նախագահը տուգանվել է Հայաստանի հետ խաղաղության արձանը «վիրավորելու» համար
Թուրքական դատարանը 10 հազար լիրա (4,000 ԱՄՆ դոլար) տուգանք է սահմանել Թուրքիայի Նախագահ Ռեջեփ Թայիփ Էրդողանի համար` հայթուրքական հաշտեցմանը նվիրված արձանը վիրավորելու համար:
Ինչպես հաղորդում է «Արմենպրես»-ը, այս մասին հայտնում է seattlepi.com կայքը` վկայակոչելով «Անադոլու» պետական գործակալությունը, Թուրքիայի Նախագահը «հրեշավոր» էր անվանել թուրք արվեստագետ Մեհմեդ Աքսոյի քանդակը, որ նվիրված էր հայ թուրքական հարաբերությունների կարգավորմանը:
Էրդողանն իր բացասական վերաբերմունքը «Մարդկության հուշարձանի» հանդեպ արտահայտել էր 2011 թվականին, երբ այն կանգնեցվում էր Կարսում` տեղական իշխանություններին դրդելով ապամոնտաժել այն: Դրանից հետո քանդակագործը հայց էր ներկայացրել ներկայիս նախագահի դեմ` «վիրավորանքի» համար: