Դեպի Հունոտի կիրճ՝ ավելի անվտանգ ճանապարհով
Այսուհետ Արցախի Հունոտի կիրճ արգելոցի տարածքով դեպի «Զոնտիկներ» անունով հայտնի մամռոտ ջրվեժ հասնելը տեղացիների ու զբոսաշրջիկների համար առավել հեշտ, արագ ու անվտանգ կլինի: Հայ լեռնագնացների միության (Armenian hikes association) ջանքերով գետի վրայով անցնելու համար տեղադրված փայտերին փոխարինել է ավելի հուսալի փայտե կամուրջ, որի բացումը կայացել է հունիսի 17-ին: Նոր կամուրջի բացման ներկա էին Արցախի Հանրապետության մշակույթի, երիտասարդության հարցերի և զբոսաշրջության նախարար Սերգեյ Շահվերդյանը, Հայ լեռնագնացների միության անդամներ, ԱՀ ՄԵՀԶ նախարարության աշխատակիցներ, զբոսաշրջիկներ:
ԱՀ ՄԵՀԶ նախարար Սերգեյ Շահվերդյանի խոսքով Հունոտի կիրճի ճանապարհի բարեկարգումն իրականություն դարձավ հասարակական ուժերով՝ Հայ լեռնագնացների միության, կամավորների, աշխատակիցների ջանքերով: «Ինչքան բարեկարգում, ավելի հարմարավետ ենք դարձնում բնապատմական արգելոցը, այնքան ավելանում է այցելուների թիվը, բնականաբար, ավելանում են նաև խնդիրները և ավելի մեծ ջանքեր պետք է ներդնել բնության անաղարտությունը պահպանելու համար»,- նշել է Սերգեյ Շահվերդյանը:
Հայ լեռնագնացների միության հետ նախարարոթյան համագործակցությունը նոր չէ, ամբողջ Արցախով այժմ հետիոտնային ճանապարհի բարեկարգման աշխատանքներ են ընթանում, որի միայն մի մասն է Հունոտի կիրճի ծրագիրը:
Հայ լեռնագնացների միության ներկայացուցիչ Գևորգ Գասպարյանը նշել է, որ բարեկարգման գաղափարը ծագել է անցած տարի՝ Թելման Ալթունի վազքից, երբ Թելման հասել էր Հունոտի կիրճ և խոստացել, որ կամուրջների հարցը կլուծվի: «Այսօր առաջին կամուրջն արդեն պատրաստ է: Ծրագրում ենք Շուշիից մինչև Քարին տակ հատվածում երեք կամուրջ կառուցել: Բացի դրանից, ծայրից ծայր բարելավվել է ամբողջ արահետը, դժվարանցանելի հատվածները փոխվել են, նորեր արահետներ են կառուցվել»,- մանրամասնել է Գևորգ Գասպարյանը՝ ավելացնելով, որ աա առաջին հերթին այցելուների անվտանգության հարցն է լուծում, ինչն իր հերթին հետագայում ավելի շատ այցելուներ կբերի տվյալ տարածք: Ըստ նրա՝ կատարված աշխատանքն ունի նաև էսթետիկ նշանակություն՝ մերված է բնության հետ: Նշել է, որ երկու ամսվա ընթացքում ավարտելու են բոլոր աշխատանքները, որից հետո կունենանք իդեալական արշավային երթուղի:
Հունոտի կիրճի բարեկարգման և կամուրջների տեղադրման աշխատանքներն իրականացվել են Հայ լեռնագնացների միության ֆինանսավորմամբ, որի մեծ մասը ստացվել է Թելմա Ալթունի մարաթոնից:
Կամուրջի վրայով առաջիններից մեկը անցել է Հայ լեռնագնացների միության Հունոտի կիրճ այցելած տասնյակ անդամներից մեկը՝ Լոս-Անջելոսից Ռոբերտ Ազարյանը, ով որպես կամավոր մասնակցել է կամուրջի կառուցման աշխատանքներին, մեծ ուրախություն է ապրել տեսնելով արդեն պատրաստ անցուղին: Նա հույս է հայտնել, որ բարեկարգված ճանապարհը կնպաստի այցելուների թվի մեծացմանը:
