Սկաուտությունը մեր ապրած կյանքի փոքրիկ աշխարհն է. Վրեժ Ասմարյան

Արցախի  նորակերտ պատմության նվիրական էջերից մեկը Ստեփանակերտում բացված Հայ մարմնակրթական ընդհանուր միությունն է:

‹‹Ապառաժ››-ը ՀՄԸՄ Արցախի մեկուսի մասնաճյուղի գործունեության եւ ծրագրերի մասին զրուցել է մասնաճյուղի ատենապետ Վրեժ Ասմարյանի հետ:

Վրեժ Ասմարյանը ներկայացրել է, որ ՀՄԸՄ-ն  ունի 111 մասնաճյուղ աշխարհի 4 կողմերում գտնվող 25 երկրներում: Արցախի մասնաճյուղը Համաշխարհային սկաուտության եւ մեր սկաուտության կառույց է, որի վարչությունն ունի 7 անդամ եւ 40 սկաուտ:

Ատենապետի խոսքով՝ ՀՄԸՄ-ի Կենտրոնական վարչությունից խմբապետներ են գործուղվում Արցախ, ովքեր մարզում եւ գիտելիքներ են հաղորդում մեր սկաուտներին: Նա ասել է, որ շատ անելիքներ ունեն ՀՄԸՄ-ի բնագավառում: Ըստ նրա՝ հեռանկարային աշխատանքները շատ մեծ են, իսկ դրանցից սպասվող ակնկալիքներն՝ ավելի մեծ:  

‹‹Մենք Արցախում պրոֆեսիոնալ ակումբ չենք, բայց կարեւորում ենք մեր երիտասարդների՝ տարբեր մարզաձեւերի, փողային երաժշտության, շքերթներ կազմակերպելու պատրաստությունը, արժեւորում հայոց մշակույթը՝ նրանց դարձնելով հոգով եւ մարմնով  բարձր սկաուտներ››, — ասել է նա:

Ատենապետը նշել է, որ Արցախի երիտասարդների համախմբումը ՀՄԸՄ-ի սկաուտական շարքերում հայոց աշխարհի Արցախ շրջանում բոլորի մեծ երազանքի իրականացումն է, որի համար ջանք եւ ուժ չեն խնայում նորակազմ վարչության անդամները:

Վրեժ Ասմարյանի խոսքով՝ մասնաճյուղի գրասենյակի համար տարածք են հատկացրել եւ արդեն ունեն նոր կառույցի նախագիծ: Ըստ նրա՝ աշխատանքներ են տարվում հասարակական կազմակերպությունը օրինական դարձնելու ուղղությամբ:

ՀՄԸՄ-ի գրասենյակի համար նախատեսված եռահարկ շենքի 3-րդ հարկը նախատեսել են հյուրերին հյուրընկալեու նպատակով մոթելի համար: Գրասենյակի տարածքում կլինեն ֆուտբոլի եւ բասկետբոլի դաշտեր:

Հոմենեթմենի ատենապետը կիսվել է վերջերս Երեւանում տեղի ունեցած 12-րդ Համագումարի տպավորություններով: Նրա խոսքով՝ որոշվել է ՀՄԸՄ-ի գալիք քառամյա ծրագիրն իրագործել Արցախում՝ Արցախի մասնաճյուղը զարգացնելու եւ հարատեւելու նպատակով:

‹‹Ուրախությունից հուզվել եւ անթաքույց հպարտություն ենք ապրել բոլորս, երբ հոտնկայս ծափողջույններով Արցախի մասնաճյուղի ատենապետին հանդիսավոր հրավիրեցին: Շատ ջերմ են ընդունել մեզ››,- հավելել է նա:

Վրեժ Ասմարյանը նշել է, որ համընդհանուր ժողով լինելու հանգամանքը չի խանգարել յուրաքանչյուրին իր ելույթում անդրադառնալ ՀՄԸՄ-ի՝ Արցախում գործունեություն ծավալելու եւ զորացնելու խնդիրներին:

‹‹Երբ Արցախի երիտասարդությունը գիտակցի, թե ինչ ասել է սկաուտություն, կսովորի սիրել եւ կցանկանա կապվել սկաուտությանը: Արցախի ազատագրական պայքարի ժամանակ ողջ հայությունը թեւ-թիկունք  է կանգնել Արցախին, այսօր էլ ՀՄԸՄ-ի ողջ ընտանիքը Սփյուռքում, Մայր Հայաստանում միավորվել է Արցախին՝ մասնաճյուղը զարգացնելու պատրաստակամությամբ, որը հարատեւելու հեռանկարներ ունի››,-հավելել է նա:

‹‹Սկաուտությունը մեր ապրած կյանքի փոքրիկ աշխարհն է՝ ավելի փափուկ եւ մեղմ»,- հավելել է նա:

Հասմիկ Հակոբյան