Շինհարթակներում շարունակվում են կյանքի կոչվել բնակարանաշինական ծրագրեր
Մայրաքաղաքի և շրջկենտրոնների բնակարանաշինական խոշոր շինարարական հարթակներում աշխատանքները շարունակվում են: Այս մասին տեղեկացրեց Քաղաքաշինության նախարարության հասարակայնության հետ կապերի և լրատվության բաժնի պետ Հունան Թադևոսյանը՝ հավելելով, որ չնայած կորոնավիրուսով պայմանավորված արտակարգ իրավիճակի որոշակի ազդեցությանը, շինարարական աշխատանքներն ընթանում են ըստ նախատեսված ժամկետների և նախագծանախահաշվային փաստաթղթերին համապատասխան:
Մեր զրուցակցի հաղորդմամբ՝ Ստեփանակերտի Թումանյան փողոցում ներդրումային ծրագրով շարունակվում են մասնավորապես 13 մասնաշենքից և մոտ 200 բնակարանից բաղկացած նոր թաղամասի կառուցման աշխատանքները:
Նույն փողոցում չի դադարել նաև մոսկվաբնակ բարերարի միջոցներով կառուցվող 10 հարկանի, ինչպես նաև Պաշտպանության բանակի միջոցներով կառուցվող 5 հարկանի բազմաբնակարան շենքերի շինարարությունը:
Ըստ Հ. Թադևոսյանի՝ բնակարանաշինական պահանջված ծրագրերը շարունակվում են կյանքի կոչվել նաև հանրապետության շրջաններում:
Արցախի ներդրումային հիմնադրամի միջոցներով շինաշխատանքներ են ընթանում մասնավորապես Կարմիր Շուկա համայնքում 2, Ասկերանում 3 բնակելի շենքերի կառուցման, ինչպես նաև Շուշի և Բերձոր քաղաքներում 1-ական շենքերի կապիտալ վերանորոգման ուղղությամբ:
Քաղաքաշինության նախարարության մամլո պատասխանատուն հավելեց, որ մայրաքաղաքում և շրջկենտրոններում պետական միջոցներով շարունակվում է տանիքների վերանորոգման ծրագիրը:
Հ. Թադևոսյանն ընդգծեց, որ շինարարական աշխատանքներն ընթանում են հակահամաճարակային կանոնների պահպանմամբ. եղանակային բարենպաստ պայմանների դեպքում աշխատանքներն ընթանում են բացօթյա պայմաններում, իսկ ներքին հարդարման աշխատանքների կատարման ժամանակ պահպանվում է սոցիալական հեռավորությունը: Մեր զրուցակցի խոսքով՝ շինարարություն չի ընթանում այն շինհարթակներում, որտեղ համավարակի կանխարգելման միջոցառումների հետևանքով աշխատուժի խնդիր է առաջացել:
Վան Նովիկով