Շահառուների ցուցակներում հայտնված հազարավոր մարդիկ զրկվել են բնակվարձերի սոցիալական աջակցությունից՝ դեռեւս տան հարցը չլուծած
Արցախցիների մեծ մասը զրկվել է 40+10 սոցիալական աջակցությունից ու երկու ամիս է, ինչ չեն կարողանում բնակվարձերը տալ։ Նրանք դա իմացել են պատահական, այդ մասին չեն զգուշացվել: Պարզվել է, որ հանդիսանում են ՀՀ Կառավարության բնակապահովման նախկին ծրագրի շահառու, որը 2020 թ-ից հետո իրականացվում էր առանձին շրջաններից տեղահանված արցախցիների համար։ Բազմիցս դիմել են ՀՀ աշխատանքի և սոցիալական հարցերի նախարարություն, որտեղ պատասխանել են, որ հարցը կլուծվի, իսկ վերջում մարդիկ կանգնել են փաստի առաջ ու հայտնվել դժվար կացության մեջ։
Պարզվել է՝ գործընթացը սկսվել է ավելի վաղ։ 2022 թվականի ամռանը ԱՀ տարածքային կառավարման և ենթակառուցվածքների նախարարությունը համայքների ղեկավարներից պահանջել է ներկայացնել վերաբնակիչների և Բաքվից փախստականների ցուցակները։ Միայն ցուցակները ներկայացնելուց հետո են համայնքների ղեկավարները իմացել դրանց կազմելու պատճառը։ Գործընթացը, սակայն, կանգ է առել, ու միայն վերջերս է այն ընթացք ստացել։
Փաստն այն է, որ շահառուների ցուցակներում հայտնված հազարավոր մարդիկ զրկվել են բնակվարձերի սոցիալական աջակցությունից՝ դեռեւս տան հարցը չլուծած, ամեն ինչ թղթի վրա է և հայտնի չէ, թե նրանց ինչ է սպասում, շատերը չեն աշխատում կամ նրանց աշխատածը քիչ է եւ չի բավարարում բնակվարձերի համար։
Նման իրավիճակում արցախցիներից շատերը թողնում են հեռանում, շատերը՝ հուսահատ շարունակում պայքարել:
Արցախահայությունն ունի բոլորիս աջակցությունը՝ իր իրավունքների եւ արժանապատիվ կենսակերպ ապահովելու հարցում:
Ապառաժ