Պաշտպանունակության համակարգի ամրապնդման համար սոցիալական արդարության հաստատումն անհրաժեշտություն է. Դ. Իշխանյան
Մարտի 13-ին Դաշնակցության կողմից ԱՀ նախագահի թեկնածու առաջադրված Դավիթ Իշխանյանը Ազգային Ժողովի պատգամավորի թեկնածուներ՝ Արթուր Մոսիյանը, Լեռնիկ Հովհաննիսյանը և Ալյոշա Գաբրելյանը նախընտրական հանդիպումներ են ունեցել Ասկերանի շրջանի մի շարք գյուղական համայնքների և շրջկենտրոն Ասկերանի բնակչության հետ:
Օրվա առաջին հանդիպումը Նախիջևանիկի համայնքում էր, որտեղ Դաշնակցության թեկնածուները նախ ծաղիկներ են դրել Արցախյան գոյամարտում զոհված քաջորդիների հուշակոթողին և հարգանքի տուրք մատուցել: Այնուհետև համայնքի ընտրողների հետ կայացած հանդիպմանը նախագահի թեկնածու Դ. Իշխանյանը, ներկայացնելով նախընտրական ծրագրի հիմնադրույթները, մասնավորապես անդրադարձել է արտաքին քաղաքականությանը և Արցախյան հիմնախնդրի կարգավորմանը վերաբերող հարցերին: Դ. Իշխանյանի խոսքով, ամբողջ աշխարհում գործող ՀՅԴ Հայ Դատի կառույցները գործունեությունը՝ Արցախյան հիմնախնդրի վերաբերյալ հայանպաստ որոշումների ընդունման և առաջ մղելու գործում, լայն հնարավորություն է ընձեռում արտաքին քաղաքականության բնագավառում Դաշնակցության ծրագրերի իրագործման համար:
Արտաքին քաղաքականության բնագավառում քայլերի համադրման և Արցախյան հիմնախնդրի կարգավորման գործընթացում հայկական կողմի դիրքերի ամրապնդման առումով, նախագահի թեկնածուն կարևորել է նաև Հայաստանի Հանրապետության և Արցախի Հանրապետության միջև ռազմաքաղաքական դաշինքի կնքումը: Ներքին բնագավառին վերաբերող ծրագրերի առաջնահերթություններից, Դ. Իշխանյանը նշեց՝ սոցիալական արդարության հաստատման անհրաժեշտությունը, որը դրական է անդրադառնալու պաշտպանության ու անվտանգության համակարգի ամրապնդմանը: Տնտեսական ոլորտում Դաշնակցության ծրագրերից, Դ. Իշխանյանը նախ ընտրողների ուշադրությանը ներկայացրեց պետության կողմից նոր շուկաների ձեռքբերման և դրանց ուղղորդման դերակատարության ստանձնումը, ինչը կխթանի փոքր և միջին բիզնեսի զարգացումը: Անդրադառնալով գյուղատնտեսությանը, նախագահի թեկնածուն նշեց, որ Դաշնակցությունը գյուղական բնակավայրերի զարգացումը տեսնում է ապակենտրոն կառավարման ձևաչափով, կապիտալ ներդրումների համաչափությունը, ինչպես նաև, յուրաքանչյուր համայնքի համար մշակված զարգացման հեռանկարային ծրագրերի շրջանակներում: Այդ համատեքստում Դաշնակցությունը կարևորում է գյուղատնտեսական ծրագրերի անտոկոս վարկավորումն ու նպատակայնությունը:
Նախիջևանիկցիների և Դաշնակցության թեկնածուների միջև աշխույժ երկխոսություն ծավալվեց առանձնապես այն ծրագրային դրույթների շուրջ, որոնք վերաբերում են կոռուպցիայի և հովանավորչության դեմ պայքարի միջոցներին ու լծակներին, աշխատավարձերի անհամաչափության խնդրի լուծման առաջարկներին ու աղքատության մակարդակի նվազեցման տեսլականին: Ընտրողները հարցադրումներ են կատարել նաև բազմազավակության, բնակարանաշինության , երիտասարդական ու կրթական խնդիրների վերաբերյալ, որոնց շրջանակում ծանոթացել են Դաշնակցության նախընտրական ծրագրով առաջարկվող լուծումներին: Օրվա ընթացքում Դաշնակցության թեկնածուները հանդիպումներ են ունեցել նաև Վարդաձորի, Ուղտասարի և Խրամորթի համայնքերում՝ ներկայացնելով նախընտրական ծրագիրը, ապա ծանոթանալով բնակիչներին մտահոգող խնդիրներին, անդրադարձել՝ դրանց լուծման տեսլականներին:
Նախընտրական հանդիպումների շարքը եզրափակվել է Ասկերանի քաղաքային համայնքում, որտեղ Դաշնակցության թեկնածուներին միացան նաև Աժ պատգամավորի թեկնածուներ՝ Վահրամ Բալայանը, Արմինե Հարությունյանը և ՀՅԴ Արցախի երիտասարդական միության ներկայացուցիչներ:
Իր խոսքում ԱԺ պատգամավորի թեկնածու Վահրամ Բալայանը Ասկերանի ընտրողներին համառոտ ներկայացրեց արտաքին ու ներքաղաքական այն մարտահրավերները, որոնց դիմակայման պատասխանատվությունը ստանձելու, ինչպես նաև պետությանն ու ժողովրդին ծառայելու պատրաստակամությամբ Դաշնակցությունը որոշել է մասնակցել Արցախի համապետական ընտրություններին:
«Դաշնակցությունն իր՝ ազգանվեր, պետականամետ գաղափարախոսությամբ, էքստրեմալ պայմաններում՝ Հայոց պետությանն ու ժողովրդին ծառայելու, գործելու և հաջողելու բազմամյա փորձով, ունակություններով վաստակել է քաղաքական գործընթացների մաս կազմելու իրավունքը»,- ասել է Վ. Բալայանը:
Ներկայացնելո, նախընտրական ծրագիրը, նախագահի թեկնածու Դավիթ Իշխանյանն ըստ ոլորտների անդրադարձել է Արցախի Հանրապետության զարգացման ուղիներին, ըստ այդմ նաև այն գործնական ու իրատեսական ծրագրերին, որոնք ժողովրդի վստահության համապատասխան չափաբաժին ունենալու դեպքում պատրաստվում է իրագործել Դաշնակցությունը՝ ներգրավելով համահայկական իր կառույցների ներուժն ու հնարավորությունները:
Այնուհետև, Աժ պատգամավորի թեկնածու Ալյոշա Գաբրիելյանը դիմելով Ասկերանի բնակչությանը, նախ շնորհակալություն է հայտնել նրանց՝ տարիներ շարունակ իրենց քվեով տարբեր պատասխանատու պաշտոններ վստահելու համար: Արժևորմելով ու կարևորելով Դաշնակցության ազգաշահ գործունեությունն ու հեռանկարային ծրագրերը, իր ելույթում Ա. Գաբրիելյանն ընդգծել է, որ ազգային արժեքների միասնության ու համերաշխության պահպանման արդի հրամայականները, առավել քան երբևէ, պահանջված են դարձրել Դաշնակցության ներկայությունը:
Բարձր գնահատելով Դաշնակցության գործունեությունը՝ հանուն ազգային գաղափարների ու նպատակների իրականացման, թեկնածուների հետ հանդիպման եկած Ասկերանի բնակիչներն իրենց հարցադրումներով հետաքրքրվել են նախագահի թեկնածու Դավիթ Իշխանյանի տեսակետներով, որոնք վերաբերում էին Արցախյան հիմնախնդրի կարգավորման բանակցային գործընթացին, ընտրական շրջանում Արցախում ձևավորված մթնոլորտին և սոցիալ-տնտեսական մի շարք խնդիրների լուծմանը:
Հավելենք, որ ընտրողների հետ Ասկերանում կայացած ջերմ ու անմիջական հանդիպումն ամփոփվել է համերգային ծրագրով, որի ընթացքում ռազմահայրենասիրական երգերի կատարմամբ են հանդես են եկել «Մենք ենք մեր սարերը» երգի-պարի պետական համույթը և ճանաչված երգիչ Մկրտիչ Մկրտչյանը:
