Մենք խաղալու ենք մեզ, ապրելու ենք մեզ. Գենա Առուշանյանը՝ նոր ներկայացման մասին

Վահրամ Փափազյանի անվան պետական դրամատիկական թատրոնի անձնակազմը 1,5 տարի է լծված է նոր՝ Արցախյան ազատամարտի հերոսներին նվիրված «Լուսաբացից առաջ» ներկայացման բեմադրման աշխատանքներին: Առաջնախաղին ընդառաջ՝ այսօր՝ նոյեմբերի 6-ին, Ստեփանակերտի Մշակույթի եւ երիտասարդության պալատի ճեմասրահում կայացել է մամլո ասուլիս, որի ժամանակ ներկայացման գլխավոր դերակատար Գենա Առուշանյանն անդրադարձել է դերի առանձնահատկությանը:

«Գերտերությունների արվեստում այսօր քաոսային մթնոլորտ է, քանզի հասարակությանը տանող ուժը՝ հերոսը, հորինվում է: Այսօր այդ գերմարդն այլ գույնի է, թռչող-մարդ է, սարդ-մարդ է, Հալք է… Բայց մեր թատրոնը որդեգրել է «կռո պոպոկի» ռազմավարությունը՝ մենք չենք հորինում:

Մենք ներկայացնելու ենք այն հերոսին, որի մարդկային հատկությունները եւ ամրությունը ձեւավորվել է՝ հրաման տալու եւ հրամանի առջեւ լինելու իրավիճակում: Մենք չենք կուրացնելու մեր հանդիսատեսին եւ մեր իսկ զգացմունքները, քանզի կրողն ենք եւ կերտողը այդ զգացմունքների: Մենք խաղալու ենք մեզ, ապրելու ենք մեզ՝ շատ նրբությամբ ու գիտակցված»,- ասել է Գենա Առուշանյանը: