Մարսէյի հայութիւնը կը մերժէ ազրպէյճանական ոտնձգութիւնները եւ կը զօրակցի հայկական բանակին

ՀՅԴ «Նոր սերունդ» երիտասարդական միութեան նախաձեռնութեամբ, Մարսէյի հայութիւնը 28 յուլիսին, բողոքի ցոյց կազմակերպեց Մարսէյի մէջ Թուրքիոյ հիւպատոսութեան դիմաց` ընդդէմ հայ-ազրպէյճանական հիւսիսարեւելեան սահմանի Տաւուշի ուղղութեամբ կատարուող ազրպէյճանական սադրանքներուն:

Ցոյցին մասնակից մը «Ազդակ»-ին հաղորդեց, որ ներկայ էին մօտ 250 հայեր, որոնց շարքին` ՀՅԴ Բիւրոյի անդամ Մուրատ Փափազեան, Ֆրանսայի Կեդրոնական կոմիտէի անդամ Հրաչ Վարժապետեան, հայկական միութիւններու ներկայացուցիչներ, քահանայ հայր, երիտասարդներ եւ տարեցներ անխտիր, որոնք եկած էին մերժելու ազերիական եւ թրքական յարձակողական քաղաքականութիւնը, ինչպէս նաեւ իրենց ամբողջական զօրակցութիւնը յայտնելու հայկական զոյգ բանակներուն:

Ազգային երգերու սփռումով, հայկական իրաւունքներուն վերաբերող կարգախօսներ բարձրացնելով, Հայաստանի եւ Արցախի զօրակցող արտայայտութիւններով ցուցարարները ուղղուեցան դէպի թրքական դեսպանատուն, որ կը պաշտպանուէր տեղական ոստիկաններու խիտ շարքերով: Հետաքրքրական էր, որ ոչ մէկ թուրք կար դեսպանատան առջեւ:

Խօսք առին Մուրատ Փափազեան, Հրաչ Վարժապետեան, ինչպէս նաեւ «Նոր սերունդ»-ի ներկայացուցիչը` Ցոլին Ճինեան: Անոնք դատապարտեցին Ազրպէյճանի եւ անոր եղբայր Թուրքիոյ հայատեաց եւ յարձակողապաշտ քաղաքականութիւնն ու գործելաոճը` դիտել տալով, որ Թուրքիա կը շարունակէ աւելի քան դար մը առաջ սկսած իր նոյն ուղին եւ հրապարակայնօրէն կը յայտարարէ հայութեան դէմ սկսած գործը` սպանդը կրկնելու իր կեցուածքը: Անոնք լուսարձակի տակ առին հայկական բանակին արձանագրած յաջողութիւնները` Ազրպէյճանի կողմէ արձակուած աւելի քան 10 անօդաչու սարքեր վար առնել, սահմանին հսկել ամենայն բծախնդրութեամբ եւ այլն, ինչպէս նաեւ շեշտեցին, որ համայն հայութիւնը զօրավիգ է իր կեանքին գնով սահմանը պաշտպանող իւրաքանչիւր զինուորի: Խօսք առնողները հաստատեցին, որ հայութիւնը միասնականութեամբ կրնայ յաղթահարել ամէն մարտահրաւէր եւ տագնապ:

2 ժամ տեւած հաւաքէն ետք ցուցարարները հանդարտօրէն ցրուեցան:

aztagdaily.com