Լոյս Տեսաւ «Արցախը մ՛երն է…» մանկապատանեկան գիրքը

Արեւելեան Ա.Մ.Ն.-ի Հ.Օ.Մ.-ի Շրջանային վարչութիւնը՝ համագործակցելով ՀԱՅԿԱՇԽԱՐՀ-ի հետ, հրապարակեց «Արցախը Մերն է…» մանկապատանեկան նկարազարդ գիրքը, որուն հեղինակն է Լիբանանի «Համազգայինի հայագիտական հիմնարկ»-ի (լեզու եւ գրականութիւն), Երեւանի Պետական Համալսարանի (կրթութեան կառավարում՝ մանկավարժութիւն-հոգեբանութիւն) բաժինները, ինչպէս նաեւ Graphic Design դասընթացը աւարտած Նայիրի Մկրտիչեան։ Գիրքին խմբագիրն է «Համազգայինի հայագիտական հիմնարկ»-ի (Պատմութիւն) եւ Երեւանի Պետական Համալսարանի «Արուեստի Պատմութիւն» բաժինը աւարտած Թամար Հերկելեան։

Գիրքը ներկայացուած է երկխօսութեամբ մը, որ կ՛ընթանայ երեխաներու եւ «Արցախ»-ի միջեւ. երեխաները «Արցախ»-ին կ՛ուղղեն զիրենք հետաքրքրող հարցերը, վերջինս ալ կը պատմէ իր՝ պատմութեան, բնութեան, եկեղեցիներու, զինանշանի, նահագներու եւ կարեւոր վայրերուն մասին։ Գիրքի կազմի առաջին էջին վրայ ներկայացուած է Արցախի «Մենք ենք մեր Սարերը» յուշարձանի թեք նկարը ( հեղինակ Մերի Ղարիպեան), զոր երեխաները կը փորձեն ուղղել, իսկ կազմի վերջին էջին՝ երեխաները Արցախը կը կցեն Հայաստանի Հանրապետութեան (հեղինակ Նայիրի Մկրտիչեան)։ Յոյսով ենք, որ նորաոճ, նկարազարդ եւ տեղեկութիւններով հարուստ այս գիրքը կը գրաւէ մեր երեխաները, կը նպաստէ ինքնութեան պահպանման եւ մեծ տարածում կը գտնէ։

Գիրքէն օրինակ մը ստանալու համար դիմեք.- Հ.Օ.Մ.-ի Արեւելեան Ա.Մ.Ն.-ի Շրջանային Վարչութեան գրասենեակ: Հեռ: 617-926-3801 կամ ե-նամակ: arseastus@gmail.com