ՀՀ կառավարությունը խոչընդոտում է Սփյուռքի լոբբիստական աշխատանքներին
Այսօր ՀՀ կառավարության օրակարգը գրեթե 100%-ով հակասում է սփյուռքյան ուղենիշներին: Alpha Newsroom-ի ուղիղ եթերում նման կարծիք է հայտնել Հայ դատի կենտրոնական գրասենյակի հատուկ ծրագրերի պատասխանատու Գևորգ Ղուկասյանը:
«Այսօր պետության և Սփյուռքում քաղաքական գործունեություն իրականացնող կազմակերպությունների միջև հարաբերությունները չափազանց վատ են, և ըստ էության, Սփյուռքն առաջնորդվում է իր քաղաքական օրակարգով, քանի որ ՀՀ կառավարության ունեցած օրակարգը գրեթե 100%-ով հակասում է սփյուռքյան ուղենիշներին: Այս պարագայում, մեզանում Սփյուռքի ներուժը հնարավորինս չի կապիտալիզացվում»,- ասել է Գևորգ Ղուկասյանը:
Ղուկասյանը, միևնույն ժամանակ, ընդգծել է, որ չպետք է թերագնահատել Սփյուռքի աշխատանքները: Նրա խոսքով՝ բացառությամբ մեկ-երկու դեպքերի, ՀՀ դեսպանատները Հայ Դատի հանձնախմբերի գրասենյակների գործունեությանը չեն խոչընդոտում, փոխարենը, Հայաստանի կառավարությունն իր քաղաքական հայտարարությունների մակարդակով է նրանց խանգարում:
Ի պատասխան հարցի՝ արդյո՞ք Սփյուռքում հայկական լոբբինգով զբաղվող կազմակերպությունները պետք է վերաձևակերպեն իրենց ռազմավարությունը, մեթոդները՝ հաշվի առնելով ստեղծված վիճակը, Ղուկասյանը ասել է, որ Հայ Դատի հանձնախմբերը 2020 թվականի պատերազմից հետո արդեն իսկ փոխել են իրենց մոտեցումները, քաղաքական առաջադրանքները և սկսել զբաղվել այնպիսի հարցերով, որոնք հայկական լոբբի համար այդ ժամանակ նորություն էին:
«Հետպատերազմյան շրջանում մենք առաջ քաշեցինք օրինակ՝ ռազմագերիների վերադարձի ապահովման հարցը, դեօկուպացիայի խնդիրների բարձրաձայնումը, Ադրբեջանի ռազմաքաղաքական ղեկավարության դեմ պատժամիջոցների կիրառման նախաձեռնությունը և Արցախի ժողովրդի ինքորոշման իրավունքի պաշտպանության հարցը միջազգային քաղաքական դիսկուրս վերադարձնելը: Վերջինը մեր պայքարում այժմ առաջին տեղն է զբաղեցնում», — շեշտել է Գևորգ Ղուկասյանը:
Alpha News-ի խնդրանքով՝ Հայ դատի կենտրոնական գրասենյակի հատուկ ծրագրերի պատասխանատուն նաև թվարկել է այն երկրների անունները, որտեղ կա հայկական համայնք, սակայն ՀՀ իշխանության աշխատանքի բացակայության պատճառով Սփյուռքի ներուժը չի օգտագործվում ու չի ռեալիզացվում՝ ինչպես հարկն է:
«Աշխատանքներ կան տարվելու Գերմանիայում, որտեղ մեծ է Թուրքիայի ազդեցությունը, Իսպանիայում, որը Ադրբեջանի հետ ունի ռազմաքաղաքական առևտրային հարաբերություններ: Այդ հանգամանքից բացի, Եվրոպական խորհրդարանի սոցիալիստական ֆրակցիայում գերակշռում է իսպանական մասը, ֆրակցիայի ղեկավարը իսպանացի է, ԵՄ բարձր ներկայացուցիչ Ժոզեֆ Բորելը նույնպես ազգությամբ իսպանացի է»,- նշել է Ղուկասյանը և հավելել, որ Իսպանիան այժմ Եվրոպայի քաղաքան վարքի վրա մեծ ազդեցություն ունեցող պետություննեից է:
Մանրակրկիտ աշխատանք պետք է տանել նաև Իտալիայի հայկական համայնքի հետ: Նրա գնահատմամբ՝ բավականին ակտիվ աշխատողներից է Եվրոպայի Հայ Դատի հանձնախումբը: Վերջերս ադրբեջանական ֆինանսավորմամբ բելգիական թերթերը ողողվել էին գրասենյակի ղեկավար Գասպար Կարապետյանի նկատմամբ հիվանդագին և կեղծ պնդումներով, որոնց հաջորդել են դատական գործընթացներ:
Արցախի և Սփյուռքի միջև քաղաքական փոխգործակցության մակարդակն ավելի բարձր է: Սա գուցե պայմանավորված է հանգամանքով, որ Հայաստան-Արցախ-Սփյուռք եռանկյունում Հայաստանն իր գագաթը հետ է քաշել. տեսակետ հայտնեց Գևորգ Ղուկասյանը:
Նրա խոսքով, Արցախի ԱԳՆ-ի և, առհասարակ, Արցախի քաղաքական շրջանակների հետ Սփյուռքի հարաբերություններն անհամեմատ լավ են, կառուցողական: Արդյունավետ փոխգործակցության տեսանելի արդյունքներից մեկը, ըստ Ղուկասյանի, եղել է ամիսներ առաջ տեղի ունեցած «Արցախ» փակ ֆորումի կազմակերպումը: Այն համախմբել է ավելի քան 300 միջազգային գործչի՝ կոնգրեսականների, Եվրոպական խորհրդարանի պատգամավորների, որոնք լսել են միմյանց ու խելք խելքի տվել, թե ինչպես կարող են իրենց նպաստը բերել Արցախի հիմնահարցի հայանպաստ կարգավորմանն ու Արցախի ժողովրդի ինքնորոշման իրավունքի պաշտպանությանը:
Ռազմավարության և անվտանգության հարցերից ելնելով՝ Ֆորումը բաց է եղել միայն գրանցված անձանց համար: Տեղեկատվությունը տարածվել է միայն ամփոփ հաղորդագրությամբ: Գևորգ Ղուկասյանն անդրադարձել է նաև Զարեհ Սինանյանի գլխավորած Սփյուռքի գործերի հանձնակատարի գրասենյակի աշխատանքներին և համարել, որ դրանք կենսական չեն:
«2018-ին, երբ Սփյուռքի նախարարությունը փակվեց, դա արդեն քաղաքական ուղերձ էր, որ ընդհանրապես, Սփյուռքին վերաբերող հարցերը Հայաստանի հասարակական, պետական քաղաքական կյանքում երկրորդվում են: Դրանով Սփյուռքի հետ հարաբերությունների նշաձողն իջեցվեց: Այդ ժամանակ ակնհայտ էր, որ Սփյուռքը այլևս չի ունենալու այն մեծ դերը, որը նախկինում նրան տրվում էր», — ընդգծել է Հայ Դատի կենտրոնական գրասենյակի հատուկ ծրագրերի պատասխանատուն՝ շեշտելով, որ պետությունը պետք է մեծ դերակատարում ունենա Սփյուռքի համայնքային կյանքի զարգացման աշխարհասփյուռ հայության միջև հարաբերությունների սերտացման գործում, ինչը այսօր չենք տեսնում:
Գևորգ Ղուկասյանի դիտարկմամբ՝ Սփյուռքն այսօր ՀՀ իշխանությունից ակնկալում է վերջ տալ պետական այն քաղաքականությանը, որը ենթադրում է Արցախից հրաժարում եւ Թուրքիային գրկաբաց ընդունում, ինչպես նաեւ ազգային արժանապատվության նվաստացում:
Հիշեցնենք՝ Սփյուռքի նախարարությունը ստեղծվել է 2008 թվականին և գործել 10-ը տարի: 2018 թվականին Հայաստանում տեղի ունեցած իշխանափոխությունից հետո, Փաշինյանի գլխավորած կառավարության որոշմամբ, Սփյուռքի նախարարությունը լուծարվել է: Վերջինիս գործառույթը 2019-ին դրվել է կառավարությանն առնընթեր Սփյուռքի գործերի գլխավոր հանձնակատարի գրասենյակի վրա, որը ղեկավարում է ԱՄՆ Գլենդել քաղաքի նախկին ղեկավար Զարեհ Սինանյանը:
arfd.am