«Հայաստանի իշխանությունները պետք է ծնկի իջնեին ժողովրդի առաջ կամ ինքնասպան լինեին». Ռոբերտ Քոչարյան
Հայաստանի իշխանությունները, եթե արժանապատվության զգացում ունենային, ապա պետք է իրենք իրենց գնդակահարեին Ղարաբաղի վերաբերյալ եռակողմ հայտարարություն ստորագրելուց հետո: Այս մասին հինգշաբթի օրը ռուսական լրատվամիջոցների համար մամուլի ասուլիսում ասաց ՀՀ նախկին նախագահ Ռոբերտ Քոչարյանը:
«Նոյեմբերի 10-ին իշխանությունները պետք է ծնկի իջնեին և ներողություն խնդրեին ժողովրդից: Եվ եթե նրանք արժանապատվություն ունենային, ապա գնդակահարեին իրենք իրենց», — ասաց Քոչարյանը:
Ըստ նրա՝ եթե ներկայիս իշխանությունները իսկապես մտածեին երկրի մասին, ապա նրանք իրենց տեղը կզիջեին այն մարդկանց, ովքեր ունակ են բանակցել:
«Իհարկե, մեզ դուր չի գալիս համաձայնագիրը: Բայց լավ պայմանավորվածություն ունենալու համար պետք է պատերազմներ հաղթել կամ գոնե չպարտվել: Ստորագրված փաստաթուղթը շարադրված է մեկ ու կես էջում: Նման հարցերը չեն կարող լուծվել մեկուկես էջով: Պետք է մշակել բազմաթիվ փաստաթղթեր առանձին մանրամասների վերաբերյալ», — ասել է Քոչարյանը …
Ըստ նախագահի՝ իշխանությունները ի վիճակի չեն դա անել՝ ոչ մտավոր, ոչ մասնագիտական, ոչ էլ բարոյական առումով: Հայաստանի ներկայիս կառավարությունը չի կարող համարժեք բանակցություններ վարել Ղարաբաղի հարցի շուրջ. նշել է երկրորդ նախագահը:
Քոչարյանը նշել է, որ ինքն իսկապես աջակցել է շարժմանը, և այդ շարժմանը հաջողվել է իր շուրջը համախմբել հասարակության զգալի մասին։
Քոչարյանի խոսքով` շարժման ներկայիս առաջնորդ Վազգեն Մանուկյանն արժանի, փորձառու քաղաքական գործիչ է։ Նա հիշեցրել է, որ շարժման նպատակը նախ կառավարության հրաժարականին հասնելն է, ապա՝ մեկ տարի անց արտահերթ ընտրություններ անցկացնելը։ Մանուկյանն այդ ընտրություններին չի մասնակցելու։ Ըստ Քոչարյանի՝ այս առումով Հայաստանում շատ քիչ քաղաքական գործիչներ կլինեն, որոնք պատրաստ կլինեն իրենց վրա վերցնել այդքան լուրջ պատասխանատվություն։