Դավիթ Իշխանյանը հաստատել է, որ եղել է «Դաշնակցություն» կուսակցության ակտիվ անդամ և երկու տարի Արցախի խորհրդարանում «Դաշնակցություն» խմբակցությունն է ղեկավարել
Ապրիլի 4-ին շարունակվել է Բաքվում ապօրինի պահվող Արցախի ռազմա-քաղաքական ղեկավարների գործով դատավարությունը։ Նիստին շարունակվել է հայ գերիների հարցաքննությունը։
Դատավարության մանրամասները ադրբեջանական իշխանությունների կողմից վերահսկվող լրատվամիջոցներից է հաղորդվում։
Ըստ տելեգրամյան ալիքների հաղորդումների` այսօր նիստի ընթացքում դատախազները հարցեր են ուղղել Արցախի ԱԺ նախագահ Դավիթ Իշխանյանին:
Դավիթ իշխանյանը հաստատել է, որ եղել է «ՀՅԴաշնակցություն» կուսակցության ակտիվ անդամ և երկու տարի Արցախի խորհրդարանում «Դաշնակցություն» խմբակցությունն է ղեկավարել:
Դավիթ Իշխանյանն ասել է նաև, որ արցախյան առաջին պատերազմին միացել է 1992 թվականի ամռանը՝ որպես «ՀՅԴաշնակցություն» կուսակցության անդամ:
Պատասխանելով գլխավոր դատախազի ավագ օգնական Վուսալ Ալիևի հարցերին` Դավիթ Իշխանյանն ասել է, որ 90-ական թվականներին Արցախի բանակի ղեկավարումն իրականացրել է ինքնապաշտպանության կոմիտեն, որի առաջնորդները Սերժ Սարգսյանն ու Սամվել Բաբայանն են եղել, բայց կառավարման մեխանիզմի մասին ոչինչ չի կարող ասել:
Նա նաև նշել է, որ արցախյան առաջին պատերազմի ժամանակ գումարտակի հրամանատար է եղել և իր վերադասն էր Մոնթե Մելքոնյանը: «Մարտունիում ութ գումարտակ կար, որոնցից մեկի հրամանատարը ես էի, այդ ութ գումարտակը գտնվում էր շրջանի պաշտպանական գծի ենթակայության տակ, որի ղեկավարը Մոնթե Մելքոնյանն էր, իսկ բանակի հրամանատարը՝ Սամվել Բաբայանը»,- ասել է Դավիթ Իշխանյանը:
Նա նաև ասել է, որ արցախյան երկրորդ պատերազմի ժամանակ այցելել է Մարտունու շրջանի զորամասերից մեկը. «Իմ կրտսեր տղան այնտեղ ծառայում էր, և նաև որպես պատգամավոր` իմ պարտքն էր անել այդ»,- ասել է Դավիթ Իշխանյանը:
Նա նշել է, որ արժանացել է «Մարտական խաչ» շքանշանին իր մարտական գործունեության համար։
Դատախազն ասել է, որ Դավիթ Իշխանյանը 2023 թվականի օգոստոսի 30-ի ասուլիսում հայտարարել է, որ բաց նամակներ է ուղարկել Ռուսաստանի, Իրանի, Ֆրանսիայի, ԱՄՆ-ի և եվրոպական երկրների խորհրդարանների նախագահներին՝ կոչ անելով ճնշում գործադրել Ադրբեջանի վրա։ «Ո՞րն էր այդ նամակների բովանդակությունը։ Ինչպիսի՞ ճնշումներ էիք կոչ անում կիրառել Ադրբեջանի նկատմամբ»,- հարցրել է դատախազը:
Դավիթ Իշխանյանը պատասխանել է. «Այո, ես նման նամակներ եմ ուղարկել, բայց տեղյակ չեմ՝ արդյոք այդ նամակները հասե՞լ են իրենց նպատակակետին»։
Այնուհետև Դավիթ Իշխանյանին հարցրել են, թե ո՞րն է եղել «Ադրբեջանի դեմ Հայաստանի ռազմական ագրեսիայի նպատակը»: Իշխանյանն ասել է. «Այդ ժամանակաշրջանի մասին չեմ կարող խոսել, քանի որ այն ժամանակ շատ երիտասարդ էի, բայց երբ չափահաս դարձա, հասկացա, թե որոնք են ռազմավարական նպատակներն ու ռազմավարական սկզբունքները. ռազմավարական նպատակը Արցախի միավորումն էր Հայաստանին»։
Դավիթ Իշխանյանը խոսել է նաև Արցախի նախկին պետնախարար Ռուբեն Վարդանյանի հետ հարաբերությունների և իրեն պատկանող հյուրանոցում նրա գտնվելու մասին. «Ռուբեն Վարդանյանի հետ ծանոթացել եմ 2010-ին կամ 2011-ին, նա սիրում էր այցելել մեր հյուրանոց, նա հանդիպումներ էր ունենում հյուրանոցում մինչև պետական նախարար դառնալը և դրանից հետո»,- ասել է Դավիթ Իշխանյանը:
Նա նշել է, որ իր ծննդյան վկայականում գրված է, որ ինքը ծնվել է Ադրբեջանական Խորհրդային Սոցիալիստական Հանրապետությունում, սակայն Հայաստանի Հանրապետության քաղաքացի է։ «Խորհրդային Միության փլուզումից հետո, ինչպես 150.000 հայերը, ես էլ եմ ընդունել ՀՀ քաղաքացիություն, ունեմ ՀՀ անձնագիր, ՀՀ քաղաքացի եմ, դա գրված է նաև իմ անձնագրում, որը ներկայումս գտնվում է քննչական մարմնում»,- ասել է Դավիթ Իշխանյանը:
Դատական հաջորդ նիստը նշանակվել է ապրիլի 4-ին։ Հաջորդ նիստին կշարունակվի գերիների հարցաքննությունը։