Ազատաշունչ երաժշտության արցախյան հասցեն. այսօր ջազի միջազգային օրն է
ՅՈՒՆԵՍԿՕ-ի ընդունած բանաձևի համաձայն` 2011 թվականից, ապրիլի 30-ին նշվում է Ջազի միջազգային օրը: Երաժշտարվեստի այս ժանրի միջազգային օրն Արցախում նշվում է սկսած 2018 թվականից: Մեզ հետ զրույցում ասաց Արցախի պետական ջազ նվագախմբի գեղարվեստական ղեկավար, հիմնադիր Տիգրան Լալայանը` հավելելով, որ մեր հանրապետությունում ջազ նվագախմբի ստեղծման մտահղացումը 2004 թվականին էր: Բավականին աշխատատար ու դժվարին նպատակը հետևողական գործունեության շնորհիվ հաջողությամբ պսակվեց: Արդյունքում արդեն 2006-ին նվագախումբը պետական կարգավիճակ ստացավ:
Հաջորդ տարում` 2007-ին, Արցախի ջազ նվագախումբը մասնակցեց միջազգային փառատոնի, որն առաջին ելույթն էր մեծ բեմում: Մինչ այդ, կայացել էր նաև համերգ Ստեփանակերտում: Գեղարվեստական ղեկավարի խոսքով, Արցախի պետական ջազ նվագախումբն այս ընթացքում մի շարք հաջողություններ է արձանագրել` տեղական ու միջազգային բեմերում մասնակցելով մի շարք փառատոների ու համերգների: Արդյունքում արցախցի ջազմենները լայն ճանաչում են ձեռքբերել ինչպես հայ այնպես էլ արտասահմանցի արվեստակիցների ու հանդիսատեսի շրջանակներում:
-Այսօր` Ջազի միջազգային օրվա առթիվ նախատեսել էինք մեծ համերգ ունենալ, որին պիտի մասնակցեին նաև համույթներ Բրազիլիայից ու Կուբայից: Ցավոք, Նոր կորոնավիրուսի համավարակի պատճառով համերգը չեղարկվեց: Հարկ է նշել, որ մինչ այս հայկական ոճի ջազի ներկայացմամբ համերգներ ենք ունեցել նվիրված Մարտին Վարդազարյանի և Ռոբերտ Ամիրխանյանի հոբելյաններին : Այս ընթացքում Երևանում մասնակցել ենք նաև «Ջազը հանուն խաղաղության» /Make Jazz Not War/
խորագրով համերգին: Այսօր էլ մենք շարունակում ենք նոր կատարումներով ու ստեղծագործություններով թարմացնել մեր ցանկը՝ արդարացնելով մեր հանդիսատեսի սպասելիքները,-մանրամասնեց Տ. Լալայանը` ընդգծելով, որ ձեռքբերած Արցախում, Հայաստանում և արտասահմանում ունեցած լայն ճանաչումն ու հանդիսատեսի համակրանքը, Արցախի պետական ջազ նվագախմբին պարտավորեցնում է շարունակաբար բարձր պահել սահմանած նշաձողը:
Ինչպես տեղեկացրեց մեր զրուցակիցը օրվա առթիվ, նախատեսվում է Արցախի պետական ջազ նվագախմբի ընդունելություն` Մշակույթի, երիտասարդության հարցերի և զբոսաշրջության նախարարի կողմից` նվագախմբի անդամներին անձամբ շնորհավորելու ու շնորհակալագրեր հանձնելու համար:
Տեղեկացնենք նաև, որ այսօր` Ջազի միջազգային օրվա առթիվ, շնորհավորական ուղերձ է հղել նաև Մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը.
-Շնորհավորում եմ ջազի սիրահարներին ու ջազ երաժիշտներին Ջազի միջազգային օրվա կապակցությամբ։
Ջազն ազատություն է, խենթություն է ու արկած։ Կլանվելով ջազի հնչյուններով՝ ունկընդիրը, երաժիշտների հետ միասին, դառնում է խենթ արկածի մի մասն ու տրվում ազատությանը։
Ուրախ եմ, որ ջազի վարակիչ ռիթմը Արցախում պարբերաբար լսելու հնարավորություն ունենք։ Եվ դա շնորհիվ Արցախի պետական ջազ նվագախմբի (ստեղծվել է 2004 թվականին, գեղարվեստական ղեկավար, հիմնադիր Տիգրան Լալայան)։ Առանձնահատուկ շնորհավորանքներս Արցախի Ջազ Բենդին, որ զարգացնելով հայաստանյան ջազի ավանդույթները՝ արցախյան ջազի հիմքը դրեց ու հաջողությամբ ներկայանում է միջազգային բեմերում։
Ջազի սիրահարներին մաղթում եմ բազում առիթներ՝ ունկընդրելու պրոֆեսիոնալ երաժիշտների հրաշալի կատարումներ, երաժիշտներին էլ՝ հավատարիմ հանդիսատես ու ստեղծագործական թռիչք,- մասնավորապես ասված է նախարարի ուղերձում:
Վան Նովիկով