Այսօր Աշան գյուղի հերոս զավակի՝ Արմեն Ավագյանի հիշատակի օրն է
Արմեն Ավագյանը ծնվել է 1967 թվականին։ Նա իր գիտակցված կյանքը նվիրել է հայրենիքի պաշտպանությանը։ Երբ սկսվում էր Արցախյան շարժման առաջին ալիքը, Արմեն Ավագյանն արդեն կանխազգում էր անխուսափելի պատերազմի վտանգը։ Նա իր ընկերների հետ սկսում է զենքեր պատրաստել և կազմակերպել գյուղի ինքնապաշտպանությունը։
Նրա նախաձեռնությամբ 1988 թվականին Աշանում կազմավորվում է առաջին ինքնապաշտպանական խումբը, իսկ մեկ տարի անց՝ կամավորական ջոկատը, որն ակտիվ մասնակցություն է ունենում ոչ միայն Աշանի, այլև հարակից գյուղերի պաշտպանությանը։
1989-ից մինչև 1994 թվականները Արմեն Ավագյանի ղեկավարած ջոկատը մասնակցում է տարբեր ուղղություններով ընթացող մարտական գործողություններին՝ Քաշաթաղից մինչև Աղդամ՝ ընդգրկվելով նաև Մարտունու պաշտպանական ստորաբաժանումների կազմում։
1992 թվականի մայիսի 15-ին Գյուլաբլու հատվածում տեղի ունեցած թեժ մարտերից մեկում Արմեն Ավագյանը հերոսաբար զոհվում է՝ հավերժ մնալով Արցախի ազատամարտի պատմության մեջ։
Ցուցաբերած հայրենասիրության և խիզախության համար Արմեն Ավագյանը հետմահու արժանանացել է բարձր պետական գնահատականի՝ պարգևատրվելով «Մարտական խաչ» երկրորդ աստիճանի շքանշանով։
Արմեն Ավագյանը մեր նորագույն պատմության այն հերոսներից է, ով ապրեց հանուն հայրենիքի, կռվեց հանուն խաղաղության և զոհվեց հանուն ազատության։
Նրա գործը ու հիշատակը շարունակ ապրելու են սերունդների սրտերում։