Արցախում միասնական քննությունները կկազմակերպվեն մեկ փուլով
Համաձայն ՀՀ կառավարության 597-Ն սահմանված կարգի՝ 2023-2024 ուստարվա դիմորդներն ընդունելության միասնական քննություններ կարող են հայտագրել և հանձնել 2 անգամ: Առաջին փուլում դիմումների հայտագրումը կիրականացվի այս տարվա դեկտեմբերի 15-ից մինչև դեկտեմբերի 25-ը, իսկ քննությունները կանցկացվեն հաջորդ տարվա հունվար-փետրվար ամիսներին (հունվարի 15-ից մինչև փետրվարի 15-ը):
Միասնական քննությունների հայտագրման և քննությունների անցկացման առաջին փուլում դիմորդները՝ ՀՀ հանրակրթական, նախնական կամ միջին մասնագիտական ուսումնական հաստատությունները տվյալ ուսումնական տարում ավարտող և նախորդ տարիների շրջանավարտները, օտարերկրացիները, օտարերկրյա պետությունների ուսումնական հաստատությունները տվյալ տարում ավարտող ՀՀ քաղաքացիները, հանձնում են առավելագույնը երկու միասնական քննություն:
Երկրորդ փուլի հայտերն ընդունվելու են 2023 թվականի ապրիլի 15-ից մինչև մայիսի 10-ը, իսկ քննությունները կանցկացվեն հունիսի 1-ից հուլիսի 10-ն ընկած ժամանակահատվածում:
Ինչպես «Ապառաժ»-ը տեղեկացավ ԱՀ Գնահատման և թեստավորման կենտրոնի տնօրեն Յուրի Քարամյանից, թեև ՀՀ կառավարության սահմանած նոր կարգի համաձայն՝ միասնական քննությունները կազմակերպվելու են 2 փուլով, սակայն Արցախում, այնուամենայնիվ, այն կկազմակերպվի մեկ փուլով, ինչպես նախկինում էր:
Որպես քննությունների չկազմակերպման պատճառ՝ Յու. Քարամյանը նշեց քննական կենտրոնների ստեղծման անհնարինությունը՝ կապված ուսումնական գործըթնացի խանգարման հետ, իսկ մյուս պատճառն էլ այն է, որ հունվար-փետրվարին դիմորդները, հանձնելով միասնական քննություններ «Հայոց լեզու», «Հայոց պատմություն», «Մաթեմատիկա» առարկաներից, ունենալու են պետական ավարտական գնահատական՝ առանց տարեկան գնահատականների:
«Հայտերն ընդունվելու են դեկտեմբերի 15-ից: Այն դիմորդները, ովքեր ցանկություն ունեն հանձնել միասնական քննություններ, պետք է ներկայանան Գնահատման և թեստավորման կենտրոն, և մենք կաջակցենք, որպեսզի նրանք կարողանան ՀՀ-ում հանձնել քննությունները»,-նշել է Յու. Քարամյանը:
Ըստ պայմանավորվածության՝ Արցախից դիմորդները քննություններ հանձնելու են հիմնականում Գորիսում, քանի որ այնտեղ է գտնվում ամենամոտ քննական կենտրոնը: Սակայն հարցին, թե արդյո՞ք հատկացվելու է տրանսպորտ՝ դիմորդների ՀՀ տեղափոխումը կազմակերպելու համար, Յու. Քարամյանը բացասական պատասխան տվեց:
«Քննություններին մասնակցելը դիմորդի ցանկությունն է: ԱՀ-ում տվյալ քննությունները չենք կազմակերպելու, սակայն աջակցելու ենք դիմորդների հայտագրմանը: Մեզ մոտ քննություններն անցկացվելու են համաձայն ԱՀ կառավարության որոշման՝ հուլիս ամսին»,-ասել է Յու. Քարամյանը:
Վահագն Խաչատրյան