Արցախի վինգչունի և թայչիի ֆեդերացիան նոր մարզադահլիճ ունի
Արցախում չինական մարտարվեստներ՝ վինգչունը և թայչին, սկսել են զարգանալ դեռևս մեկ տասնամյակ առաջ: Մարզիչ Սայաթ Բաղդասարյանն իր մարզչական գործունեության ընթացքում՝ սկսած 2003թվականից, մարզել է շուրջ 1500 մարզիկ: Նրանց թվում են նաև ՀՀ , Եվրոպայի չեմպիոններ, մրցանակակիրներ և աշխարհի մեկ փոխչեմպիոն: Վինգչունի և թայչիի ֆեդերացիան Արցախում հիմնադրվել է 2017թվականին: Ներկայում այս մարզաձևերով կոփվում է տարիքային տարբեր խմբերի 30 մարզիկ: Տարիներ շարունակ ֆեդերացիան չուներ համապատասխան պայմաններ ունեցող մարզադահլիճ: Եղածն էլ անմխիթար վիճակում էր: Ստեփանակերտում հարմարավետ և վերանորոգված մարզադահլիճ ունենալը, ֆեդերացիայի համար իրաականություն է դարձել ԱՀ նախագահի խորհրդական, «Ապագա սերունդների հիմնադրամի» հիմնադիր Գրիգորի Գաբրիելյանցի աջակցության շնորհիվ: Նախօրեին կայացել է Արցախի վինգչունի և թայչիի ֆեդերացիայի վերանորոգված դահլիճի բացման հանդիսավոր արարողությունը, որին ներկա էին ԱՀ նախագահ Արայիկ Հարությունյանը, Ռազմահայրենասիրության, երիտասարդության, սպորտի և զբոսաշրջության նախարար Սամվել Շահրամանյանը:
Վինգչունի և թայչիի ֆեդերացիայի գործունեությունն ու առաջիկա ծրագրերը ներկայացրել է Սայաթ Բաղդասարյանը: Վերջին տարիներին վինգչունի և թայչիի արցախցի մարզիկներն արտերկրում մասնակցել են միջազգային մի շարք առաջնությունների՝ գրավելով և պատվավոր ու մրցանակային տեղեր: Մարզչի համոզմամբ, վերանորոգված և հարմարավետ մարզադահլիճը հնարավորություն կընձեռի առաջիկայում էապես ավելացնել մարզվողների թիվը:
Նա նաև շնորհակալագիր է հանձնել Գ. Գաբրիելյանցին: Բացի այդ, ֆեդերացիայի խորհրդի որոշմամբ, բարերարին շնորհվել է Արցախի Հանրապետության վինգչունի և թայչիի ֆեդերացիայի պատվավոր անդամի կոչում:
Ֆեդերացիայի զարգացման գործընթացին նպաստելու և անձնակազմի կողքին լինելու համար պատվավոր անդամի կոչման է արժանացել նաև Էրիկ Ավանեսյանը:
Ֆեդերացիայի բարեկամ ու արդեն նաև պատվավոր անդամ Գ. Գաբրիելյանցի ձեռամբ՝ առաջին և երրորդ վկայականներ են ստացել մի խումբ մարզիկներ:
Մարզադահլլիճի բացմանը վինգչունի հնարքներ են ցուցադրել ֆեդերացիայի կրտսեր և ավագ խմբերի մարզիկները:
