«Ապառաժ»-ը՝ վերադարձի հավատքով, շարունակում է իր գործունեությունը
2023 թ-ի արցախյան ողբերգությունից հետո արցախյան մամուլը դադարեց գործել, դադարեցվել էր նաեւ «Ապառաժ» երկշաբաթաթերթի տպագրությունը, սակայն շարունակել է գործել «Ապառաժ» (www.aparaj.am) կայքէջը, որը, անկախ ստեղծված իրավիճակից եւ դժվարություններից, չի դադարել իր գործունեությունը:
«Ապառաժ»-ն Արցախում հասանելի էր յուրաքանչյուրին, այժմ եւս նախատեսվում է օնլայն տարբերակով հասանելի դարձնել այն իր ընթերցողներին:
«Ապառաժ» (www.aparaj.am) կայքը վերաթարմացված շարունակելու է իր ուսումնասիրությունները Արցախի հասարակական, սոցիալական, քաղաքական հիմնախնդիրների շուրջ, լուսաբանելու է աշխարհում եւ համահայկական տիրույթում առկա իրադարձությունները, շարունակելու է բարձրաձայնել արցախահայության իրավունքների վերականգման եւ այդ համատեքստում միջազգային արդարադատությանը հասնելու Հայ դատի պայքարը, խոսելու տարագիր Արցախի ժողովրդի ճակատագրի, առկա խնդիրների եւ դրանց ուղղված քայլերի ու լուծումների մասին։
«Ապառաժ»-ը (www.aparaj.am) պատրաստ է շարունակելու իր համագործակցությունը Արցախի մտավորականության, լրագրողական համայնքի հետ եւ լուսաբանելու Արցախի մշակութային, կրթական, համայնքային հաստատությունների աշխատանքները, որոնք շարունակում են իրենց գործունեությունը Հայաստանի Հանրապետությունում։
«Ապառաժ»-ն Արցախում՝ որպես քաղաքական, հասարակական եւ գրական թերթ, առաջին անգամ հրատարակվել է 1917 թ-ին՝ Շուշի քաղաքում, երկար ընդմիջումից հետո այն հրատարկվել է 1991 թ-ին, լուսաբանել Արցախի ազատագրական պայքարի ընթացքը, հայ ժողովրդի պայքարի ուղին՝ մինչեւ մեր օրեր, սերմանել գաղափարական եւ ազգային արժեքներ։ 2020 թ-ի 44 օրյա պատերազմի ժամանակ եւս երկշաբաթաթերթի հրատարակությունն առժամանակ դադարեցվել եւ վերահրատարկվել էր 2021 թ-ի գարնանը, սակայն aparaj.am կայքէջը, 2010թ-ից, բոլոր իրավիճակներում, շարունակել է իր գործունեությունը։
«Ապառաժ»-ը՝ վերադարձի հավատքով, շարունակում է իր գործունեությունը Հայաստանում, հավատարիմ մնալով իր ընթերցողներին:
ԱՊԱՌԱԺ