«Ապառաժ»-ը շնորհավորում է «Հորիզոն»-ի 45-ամյակը՝ մաղթելով հարատեւ ընթացք

Օրերս նշվել է Կանադայում լույս տեսնող «Հորիզոն» շաբաթաթերթի 45-ամյակը։ Հոբելյանական այս տարեթվում անգնահատելի է «Հորիզոն»-ի դերը արցախյան տարեգրության մեջ։ Ազատագրական պայքարից մինչեւ մերօրյա ցավալի կորուստներ՝ «Հորիզոն»-ը բարձրացրել եւ շարունակում է բարձրացնել Արցախյան հիմնախնդիրը, Արցախի հերոսական ժողովրդի պատմական ընթացքը, արցախահայության իրավունքների հարցը՝ հանդիսանալով այն կարեւոր հարթակներից մեկը, որը լսելի է դարձնում աշխարհին Արցախի ձայնը։

«Հորիզոն»-ն իր մշտական ներկայությունն ունենալով Արցախում՝ կարեւոր ներդրում է ունեցել Արցախի լրագրողական համայնքի զարգացման գործում։ «Ապառաժ»-ի հետ համագործակցությունը միշտ եղել է գործուն եւ արդյունավետ։ Արցախի ժողովրդի բռնի տեղահանությունից հետո, «Ապառաժ»-ի վերաբացման առիթով՝ «Հորիզոն»-ն առաջիններից է, որ արձագանքել է խնդիրներին եւ աջակցել է աշխատանքների կազմակերպմանը։

Շնորհավորելով «Հորիզոն»-ին՝ հարատեւ ընթացք ենք մաղթում մեր գործընկերներին։ Գնահատելի է ձեր նվիրումն ու այն հաստատումը, որ Արցախի համար պայքարն ավարտված չէ․ այսօր, քան երբեւէ՝ անելիքը շատ է, եւ շատ կարեւոր է համախմբված աշխատանքը՝ ի նպաստ Հայաստանի, Սփյուռքի եւ Արցախի։