Խաղաղութեան դրական ազդակներ Թուրքիայի՞ց…

Հայաստանի կառավարութեան նիստում Ն. Փաշինեանը վերահաստատելով հէնց օրերս խորհրդարանում ներկայացրած իր հնգամեայ ծրագրում մատնանշած «Խաղաղութեան դարաշրջան սկսելու» ականջահաճոյ թէզը, առանց որեւիցէ պատմական ու աշխարհագրաքաղաքական ժամանակակից-անմիջական իրողութիւնների մեկնաբանման, յայտարարեց, որ «Տարածաշրջանային խաղաղութեան թեմայով որոշակի հրապարակային դրական ազդակներ կան Թուրքիայի կողմից…» ու յաւելեց. «Մենք այդ ազդակները կը գնահատենք եւ դրական ազդակներին դրական ազդակներով կը պատասխանենք»…:

Կա՞յ նման ապացոյց, իրողութիւն…

Այո, կա՛յ, իսկ նմանօրինակ ազդակների հասցէատէրերն են լոկ՝ Ադրբեջան կոչւող շինծու պետութիւնը, Պակիստանի նման ԴԱԷՇ-ածին երկիրը ու մէկ էլ՝ Կիպրոսի Հանրապետութեան օկուպացրած «թուրքական համայնքը»…:

Հիմա դիտարկենք Ն. Փաշինեանի մատնանշած տարածաշրջանի ու դեռ յարակից տարածաշրջաններում «թուրքական խաղաղութեան դրական ազդակներին», զորօրինակ՝ Սիրիայում, Իրաքում ու այդ երկրից անբաժան քրդական ինքնավար շրջանում, Աֆրիկեան տարածաշրջանի Լիբիայում ու նմանատիպ «խաղաղ ազդակները»՝ Եգիպտոսի նկատմամբ ու դեռեւս միջերկրածովային տարածաշրջանում ու Էգէյեան ծովում՝ Յունաստանի հողային ամբողջականութեան հաշւին…:

Դեռ զանց առած՝ թուրքական միեւնոյն «խաղաղասիրական ազդակների» գնահատականը նոյնինքն սեփական երկրում բնակւող միլիոնաւոր քրդական ժողովուրդների ու այլ փոքրամասնութիւնների առնչութեամբ: Եւ կարեւորը՝ զանց առած թուրքական բազմադարեայ եւ առաւել եւս մինչ Հայոց Ցեղասպանութեան ու յետցեղասպանական «խաղաղութեան ազդակները»…

Ի դէպ՝ Թուրքիային խաղաղութեան աղաւնու կերպաւորման նենգամիտ թէզի քարոզչամեքենան, յանձնիս պետրոսղազարեանական Հ1-ի, թերեւս կարճ ժամկէտում ի զօրու լինի շարունակել մոլորեցնել Շուռնուխի, Որոտանի, Առաջաձորի եւ միւս գիւղաբնակ համայնքների մշտապէս խաղաղասէր ու միամիտ բնակչությանը, բայց երբեք՝ հայրենիքի անվտանգութեամբ ու ինքնիշխան պետականութեամբ մտահոգւող Հայաստանի ու Արցախի զգօն հասարակայնութեանը, որին անբեկանելիօրէն հոգով ու սրտով միացած է արտերկիր-Սփիւռքը, յատկապէս երբ հայրենիքի վտանգւածութեան սպառնալիքը ազդարարւած է ցեղասպան ու հայատեաց թուրքա-ադրբեջանական դահիճների կողմից…:‎

Դերենիկ Մելիքեան
«ԱԼԻՔ» օրաթերթի գլխավոր խմբագիր

arfd.am