Գինու փառատոն Արցախում
Հոկտեմբերի 18-ին Հադրութի շրջանի Տող գյուղում կայացավ Արցախյան գինու առաջին փառատոնը:
Փառատոնի նախաձեռնողն էր ԼՂՀ ԿԱ զբոսաշրջության և պատմական միջավայրի պահպանության վարչությունը, այն կոչված էր զբոսաշրջության միջոցով աշխուժացնելու Հարավային զբոսաշրջային երթուղու վրա գտնվող համայնքների զարգացումը` ինչպես նաև դրական ազդեցություն թողնելու ԼՂՀ զբոսաշրջության զարգացման վրա:
Փառատոնը, կարևորվում է նաև արցախյան գինեգործության ավանդույթների վերծանման տեսանկյունից: Արցախյան գինու արտադրողների, ինչպես նաև ՀՀ գինեգործների համար այս տարվանից ստեղծվում է մի հարթակ, որտեղ հնարավորություն է ընձեռնվում կազմակերպել իրենց արտադրության վաճառքը, իրականացնել փորձի փոխանակում, գովազդել իրենց արտադրությունը և այլն:
Փառատոնի ծրագիրն իր մեջ ներառում էր գինեգործության հնագույն և ինքնատիպ ծիսակատարությունը` տաշտում գինի ճզմելը, արցախյան ավանդական ուտեստների հյուրասիրություն, արվեստի գործերի ցուցահանդես-վաճառք, Տողի Մելիքական ապարանքի հնագիտական գտածոների ցուցադրություն և, իհարկե, գինի արտադրողների ցուցահանդես-տոնավաճառ, որտեղ ներկայացված էին Արցախի 5 շրջանների և Հայաստանի գինիները: Փառատոնը ուղեկցվում էր հայկական ազգային երգ ու պարով:
