ԳԹԿ-ն միասնական քննությունների վերաբերյալ դիմում-բողոքներ է ստացել

Միասնական քննությունների ու բարձրագույն ուսումնական հաստատությունների ընդունելության գործընթացի այս տարվա առանձնահատկությունները հիմնականում պայմանավորված են համավարակային արտակարգ իրավիճակով թելադրված միջոցառումներով: Երեկ՝ հուլիսի 8-ին կայացել են վերջին միասնական քննությունները՝ «հայոց լեզու և գրականություն», «ֆիզիկա» և «կեսաբանություն» առարկաներից:

Ինչպես հայտնի է յուրաքանչյուր մասնագիտության համար, այս տարվա դիմորդները քննություն են հանձնել մեկ առարկայից: Բնականաբար, դպրոցական յուրաքանչյուր առարկայի քննության արդյունքի կարևորությունը դիտարկելի է այս տեսանկյունից: Արդեն հայտնի են քննությունների արդյունքները մասնավորապես` պատմություն առարկայից քննություն հանձնող մեծաթիվ դիմորդները, հիմնականում ընտրել էին այնպիսի մասնագիտություններ, ինչպիսիք են՝ իրավագիտությունը, քաղաքագիտությունը, միջազգային հարաբերությունները և այլն: Մեզ հետ զրույցում, Գնահատման և թեստավորման կենտրոնի տնօրեն Յուրի Քարամյանն անդրադառնալով միասնական քննությունների արդյունքներին, նշեց, որ ամենաշատ թվով բացասական գնահատականներ գրանցվել են Հայոց պատմություն առարկայից: Քննությանը մասնակցած 140 դիմորդից, ըստ թեստային առաջադրանքներից հավաքած միավորների՝ դրական շեմը չեն հաղթահարել 82-ը կամ 59 տոկոսը /անբավարար է համարվում 0-ից մինչև 7.25 միավորը/:

Փոխարենը, ինչպես և նախորդ տարի, գոհացուցիչ արդյունքներ են գրանցել անգլերենից միասնական քննություն հանձնողները: Բացի այդ, ԳԹԿ տնօրենն աննախադեպ է համարում քիմիայից արձանագրված դրական ցուցանիշները: Քննությանը մասնակցած 19 դիմորդներից 5-ը ստացել են առավելագույն՝ 20 միավոր, իսկ 14–ը 18-ից մինչև 20 միավոր: Ըստ Յու. Քարամյանի՝ մյուս առարկաներից քննական արդյունքը, նախորդ տարվա համեմատ, գրեթե նույնն է:

ԳԹԿ տնօրենի հաղորդմամբ, այս ընթացքում 4 դիմում-բողոք են ստացել, որոնք վերաբերում են անգլերենի, քիմիայի և աշխարհագրության միասնական քննությունների արդյունքներին ու թեստային առաջադրանքներին:

Ըստ հաստատված ժամանակացույցի, միասնական քննությունների վերջնարդյունքը հայտնի կլինի հուլիսի 11-ին՝ բողոքարկման հանձնաժողովի նիստից հետո: