Բենզինի և դիզվառելիքի գներն աճել են
Արցախյան շուկայում անցած շաբաթվանից թանկացել են բենզինն ու դիզվառելիքը: Մշտադիտարկման արդյունքում, ԱՀ ՀԾՏՄ կարգավորող հանձնաժողովի տնտեսական մրցակցության պաշտպանության բաժինը, բենզինի և դիզվառելիքի 20 դրամով գնաճն արձանագրել է ընթացիկ տարվա հունիսի 18-ին: Մասնավորապես գերիշխող դիրք զբաղեցնող՝ «Ֆլեշ պլյուս» ՍՊԸ լցակայաններում, այսօրվա դրությամբ ռեգուլյար տեսակի բենզինի 1 լիտրի արժեքը կազմում է 310 դրամ, իսկ դիզվառելիքինը ՝ 330 դրամ:
«Ապառաժ»-ի հետ զրույցում, հանձնաժողովի տնտեսական մրցակցության պաշտպանության բաժնի պետ Սերգեյ Գրիգորյանը պարզաբանել է, որ շուկայում գերիշխող դիրք զբաղեցնող արցախյան տնտեսվարողների մոտ բենզինի և դիզվառելիքի գնաճը պայմանավորված է ձեռքբերման գների թանկացմամբ, որը նախևառաջ գրանցվել է Հայաստանի Հանրապետությունում: Բացի այդ, գնաճ է նկատվում նավթամթերքի համաշխարհային շուկայում:
Մեր զրուցակցի խոսքով, նախորդ տարվա համեմատ, ընթացիկ տարվա սկզբից մինչև հունիսի 18-ն ընկած ժամանակահատվածում, ռեգուլյար տեսակի բենզինի 1- լիտրի արժեքը նվազել էր շուրջ 140 դրամով: Մեր զրուցակցի խոսքով, ներկայումս երևանյան և արցախյան շուկայում բենզինի ու դիզվառելիքի գնային տարբերությունը կազմում է 10 դրամ , մինչդեռ նախորդ տարիներին , արցախյան շուկայում բենզինն ու դիզվառելիքը համեմատաբար թանկ էին 20 դրամի չափով :
«Ինչ վերաբերում է դիզվառելիքին, ապա վերլուծություններն ու ուսումնասիրությունները ցույց են տալիս, որ գնաճի վրա, որոշակիորեն ազդեցություն է ունեցել նաև պահանջարկի աճը, որը պայմանավորված է տարվա այս ժամանակահատվածին բնորոշ ՝ գյուղատնտեսական եռուն աշխատանքերով»,- մանրամասնել է ոլորտի փորձագետը:
Ս. Գրիգորյանը նշել է, որ տնտեսական մրցակցության պաշտպանության բաժինը իր մշտադիտարկման և վերահսկողական գործառույթների շրջանակում ուշադրության կենտրոնում է պահում նավթամթերքի շուկայում գերիշխող դիրք զբաղեցնող տնտեսվարողների փաստաթղթերը՝ կապված գնային քաղաքականության հետ:
