Վերակառուցման աշխատանքներ են սկսվել Սիրիայի Հարասթա քաղաքում

Սիրիայի Հարասթա քաղաքում, որը Դամասկոսին մոտ է, սկսել են փլատակների մաքրման և ճանապարհների վերականգնման աշխատանքները։ Այս մասին գրում են ռուսական լրատվամիջոցները՝ հղում անելով տեղական իշխանության ներկայացուցիչ Ահմադ Ռուստումին։

Նրա խոսքով՝ քաղաքում յոթ տարվա ընթացքում ավիրվել է քաղաքի շինությունների 60 տոկոսը։

«Սկզբում կմաքրվեն ճանապարհներն ու շենքերի մուտքերը, որպեսզի ծանր տեխնիկան կարողանա աշխատել, այնուհետև ամենաշատ քանդված տները կապամոնտաժվեն, իսկ որոնք ավելի քիչ են վնասվել, կպահպանենք վերականգնման համար»,- ասել է Ռուստումը։

Իշխանությունները նախատեսում են, որ քաղաքի վերականգնումը կտևի վեց ամիս։

Նշվում է, որ 2013 թվականին քաղաքի բնակչությունը կազմել է ավելի քան 45 հազար մարդ, սակայն զինյալների հարձակումից հետո բնակչությունը նվազել է՝ հասնելով հազար մարդու։ Զինյալները քաղաքը լքել են այս տարվա գարնանը։