Բաքուն սպառնալիք է զգում հայկական Սփյուռքից, և փորձում է չեզոքացնել այդ «վտանգը»
Մեծ Բրիտանիայի Լորդերի պալատում բարձրացվել է հարց Ադրբեջանի կողմից Լեռնային Ղարաբաղից գերեվարված 23 հայերի նկատմամբ դաժան վերաբերմունքի մասին։ Հարցի հեղինակը եղել է Վինչեսթերի եպիսկոպոսը; Պատասխանելով հարցին՝ Լեյբորիստական կուսակցության անդամ, Դարլինգթոնի բարոնուհի Ջենի Չեփմանը ներկայացրել է Արտաքին գործերի, համագործակցության և զարգացման նախարարության պատասխանը։
Եպիսկոպոսը հարցրել է, թե ինչ հայտարարություններով են Մեծ Բրիտանիայի իշխանությունները դիմել Ադրբեջանի կառավարությանը, և ինչ քայլեր են ձեռնարկվում միջազգային գործընկերների հետ համակարգմամբ՝ Ադրբեջանի կողմից իր միջազգային պարտավորությունների կատարման ապահովման նպատակով։ Ի պատասխան՝ բարոնուհի Չեփմանը նշել է, որ Մեծ Բրիտանիան Ադրբեջանի իշխանություններին կոչ է արել ապահովել, որպեսզի 2023 թվականի սեպտեմբերին Լեռնային Ղարաբաղում ռազմական գործողությունների ժամանակ ձերբակալված անձինք կանգնեն արդար դատաքննության առջև և պահվեն անվտանգ պայմաններում՝ համաձայն Ադրբեջանի ստանձնած միջազգային պարտավորությունների։
Թեմայի վերաբերյալ Alpha News-ը զրուցել է Մեծ Բրիտանիայի Հայ դատի հանձնախմբի նախագահ Անետ Մոսկոֆյանի հետ:
«Ադրբեջանը լավ ըմբռնում է մեր լոբբինգը Սփյուռքում, համակարգված արձագանքում են իրենց կառավարության ներկայացուցիչների միջոցով: Նման օրինակներ ունեցել ենք 2020թ. պատերազմից հետո, երբ մեծ Բրիտանիայում Թուրքիայի ու Ադրբեջանի դեսպանները «հետանդում էին» Բրիտանիայի պատգամավորներին՝ նամակներ գրելով, հրավիրելով նրանց հանդիպումների: Այսինքն՝ բուլինգի նման էր սա: Չափազանց լավ են աշխատում այս առումով: Նրանք Սփյուռքից սպառնալիք են տեսնում ու փորձում են չեզոքացնել այդ վտանգն ու ուժը»,- ասել է Անետ Մոսկոֆյանը:
Նրա խոսքով՝ Ադրբեջանը փորձում է լավ իմիջ ստեղծել իր երկրի համար:
«Ադրբեջանը փորձում է պատրանք ստեղծել, թե այնտեղ կա կրոնական փոքրամասնությունների ազատություն: Կան բազմաթիվ միջազգային զեկույցներ՝ ԱՄՆ-ի, ԵՄ-ի, այլ երկրների ու կազմակերպությունների կողմից, որոնք քննարկում են որոշ կրոնական փոքրամասնությունների ու կրոնական առաջնորդների հալածանքները, ներառյալ՝ Արցախի էթնիկ զտումները: Ադրբեջանը սա հասկանում է ու համակարգված փորձում է լավ իմիջ ստեղծել իր երկրի համար»,-ասել է Անետ Մոսկոֆյանը: