Արցախ վերադառնալու քաղաքական իրավունքը պետք է պահենք շատ ակտիվ
Ազատության հրապարակում այսօր տեղի է ունեցել հանրային քննարկում՝ Արցախի ժողովրդի վերադարձի իրավունքի վերաբերյալ: Բանախոսներն էին միջազգային իրավունքի առաջատար մասնագետ Արա Ղազարյանը և ՀՀ Մարդու իրավունքների առաջին պաշտպան Լարիսա Ալավերդյանը:
«Արցախ վերադառնալու քաղաքական իրավունքը պետք է պահենք շատ ակտիվ։ Մենք պետք է աշխատենք աշխարհի ազդեցիկ պետությունների հետ, որոնք մշտական պետք է պահեն այդ հարցը քաղաքական օրակարգում՝ արցախցիների հավաքական վերադարձն իրենց երկիր»,- Արցախի ժողովրդի վերադարձի իրավունքի թեմայով հանրային քննարկման ժամանակ ասաց ՀՀ մարդու իրավունքների առաջին պաշտպան Լարիսա Ալավերդյանը։
Նույն քննարկման բանախոս միջազգային իրավունքի մասնագետ Արա Ղազարյանն էլ անդրադարձավ գույքի հանդեպ իրավունքի իրացման խնդրին, նրա գնահատմամբ՝ բոլոր նրանք, ովքեր բռնի տեղահանվել են ու Արցախում թողել են գույք, ապա միշտ պետք է հիշեն, որ իրենց գույքի նկատմամբ իրենց իրավունքը շարունակում է պահպանվել ու պահպանվելու է տասնամյակներ շարունակ։
Արցախցիների իրավունքների պաշտպանության խորհրդի կողմից իրականացվող այս շարունակական հանրային քննարկումները նպատակ ունեն ներկայացնել Արցախի ժողովրդի տարբեր իրավունքների վերաբերյալ փորձագիտական մեկնաբանություններ և ստանալ հանրության լայն շրջանակների կարծիքներն ու առաջարկները: