120 000 արցախահայեր գտնվում են կենսական ծանր պայմաններում, եկել է միասնական լինելու պահը. հոգևորական
Արդեն յոթ ամսից ավելի է, ինչ փակ է Արցախի կյանքի ճանապարհը, հավաքվել ենք այսօր այստեղ միաբանված լինելու և մեր արդարացի կոչն ուղղելու՝ բացելու կյանքի ճանապարհը: Այս մասին այսօր՝ հուլիսի 17-ին, Երևանում ՄԱԿ-ի գրասենյակի դիմաց արցախցիների բողոքի ակցիայի ժամանակ ասաց հոգևորականը։
Նա կոչ արեց. «120 000 արցախահայեր գտնվում են կենսական ծանր պայմաններում։ Եկել է միասնական լինելու, ոտքի կանգնելու ու մեր արդարացի պահանջը համայն աշխարհին ներկայացնելու պահը։ Արցախը եղել է, կա, պետք է լինի հայկական, ու մենք՝ հայերս, պետք է պահանջատեր լինենք մեր հայրենիքին։
Երբեք հույսներս չկորցնենք, այլ համախմբվենք, լինենք միասնական։ Եկել է պահը»։
Ակցիայի մասնակիցները հիշեցրին՝ ՄԱԿ-ը նպատակադրվել է նվազեցել մանկական մահացության թիվը, մինչդեռ Արցախում շրջափակման պատճառով մահանում են հացի հետևից գնացող միայնակ մոր երեխաները. «Ո՞ւմ են պետք պլակատային կարգախոսները։ Շրջափակված Արցախի անունից կոչ ենք անում միջազգային կառույցներին, ՄԱԿ-ի անդամ պետություններին՝ հայտարարություններից, հորդորներից զատ գործնական քայլերով կանխել Արցախում Ադրբեջանի կողմից իրականացվող էթնիկ զտումների և ցեղասպան քաղաքականությունը, իրավական պատժամիջոցներով գործի դնել Հաագայի դատարանի որոշումները»։
Նշենք, որ ակցիայի մասնակիցները ՄԱԿ-ի գրասենյակի մոտից շարժվելու են նաեւ դեպի ՌԴ դեսպանության շենք:
news.am