Հայրենիքի մեջ բանտարկվել ենք, իսկ ում չեն կարողանում բանտարկել, արգելում են հայրենիք գալ․ Գոռ Սարգսյան

— Վերջին 3 տարում դաշնակցական երիտասարդը այնտեղ էր, որտեղ պայքար կար, պատերազմի դաշտից մինչև Երևանի փողոցներում ցույցեր, մինչև տարբեր երկրներում դեսպանատների առջև բողոքի ցույցեր: — Այս մասին ՀՅԴ Երիտասարդականի Համաշխարհային համագումարի բացման պաշտոնական արարողությանը իր ելույթում ասաց ՀՅԴ ՀԵՄ ԿՎ նախագահ Գոռ Սարգսյանը։

«Բնականաբար հալածվել ենք թուրքերի ու Հայաստանում գործող ապազգային, թուրքական շահը հետապնդող իշխանությունների կողմից: Հայրենիքի մեջ բանտարկվել ենք, իսկ ում չեն կարողանում բանտարկել, արգելում են հայրենիք գալ: Բայց այս ճնշումները մեզ հետ չեն պահելու հանուն հայրենիքի գործելուց, այս Համագումարը դրա ապացույցն է, քանի որ բոլորը գիտեն, որ մեր օրակարգերը հանուն հայրենիքի են, միտված են այսօրվա իրավիճակից ելքեր գտնելուն, ու գործելու հանուն մեր ժողովրդի, հանուն Արցախի, հանուն Հայաստանի»,- ասաց նա:

Նրա խոսքով՝ իրենցից ավագ սերունդը 90-ականներին գործեց հանուն Արցախի, ապրեց և հարկ եղած դեպքում նաև զոհվեց հանուն Արցախի, ու ազատագրեց Արցախը․

«Եթե այս համագումարն անցկացվեր երեք տարի առաջ, մեր շատ ընկերներ, ովքեր կյանքը նվիրեցին հայրենիքին, կլինեին մեզ հետ: Ուստի մենք մեր ընկերների հանդեպ պարտք ունենք։ Պարտք ունենք նրանց գործը շարունակելու, ցույց տալու, որ Արցախը երբեք չի լինելու Ադրբեջանի կազմում։ Ուրեմն՝ մենք պետք է շարունակենք նրանց գործը և մեր առաջիկա գործունեության մեջ պետք է գործենք հանուն Արցախի տրամաբանությամբ, թե՛ Հայաստանի մեջ թե՛ Սփյուռքում»,- ասաց նա։

yerkir.am