Միասնաբար բռնենք արցախյան շարժման ռահվիրանների ձեռքը՝ շարունակելու մեր արդար պայքարը. Արցախի թեմի առաջնորդ
Ստեփանակերտի Վերածննդի հրապարակում կայացած հանրահավաքին ուղերձով հանդես է եկել Հայ առաքելական եկեղեցու Արցախի թեմի առաջնորդ Վրթանես եպիսկոպոս Աբրահամյանը.
«Իրապես դուք հերոս ժողովուրդ եք. այսօր դուք մի կողմ եք թողել ձեր բոլոր տեսակի անձնական նեղություններն ու դժվարությունները և եկել եք այստեղ՝ Ստեփանակերտի Վերածննդի հրապարակ՝ ձեր հերոս նախնինների սրբազան կանչով, ովքեր սկսեցին արցախյան շարժումը, որը հետո դարձավ պայքար ու գոյամարտ, որպեսզի ցույց տա համայն հայությանը, որ Արցախը ապրում է և պիտի ապրի, քանզի ավետարանական խոսքի համաձայն՝ մեր այո-ն այո է. և ոչը՝ ոչ:
Ես՝ որպես թեմակալ առաջնորդ, ոչ միայն օրհնում եմ, այլև խոնարհվում եմ ձեր նվիրական կեցվածքի առջև:
Մենք շատ մեծ գին ենք վճարել, որ կարողանանք ապրել ազատ, անկախ, ինքնորոշված Արցախում: Եվ մեր այսօրվա խորհրդանշական հավաքը վառ ապացույցն է այն իրողության, որ արցախյան շարժումը ավարտված չէ և այն շարունակվում է նոր շեշտադրմամբ, որովհետև մենք ապրող ազգ ենք, և հակառակ տեսանելի և անտեսանելի թշնամիների՝ Արցախը պետք է ապրի և զորանա:
1988թ. անկախության այո-ն մնում է այժմեական և ավելի զորեղ: Որպեսզի այն դառնա համախմբող ողջ հայության համար, պիտի դառնա հոգու ճիչ՝ անտարբերությունից հանելու շատերին և ճշմարիտ ճանապարհից շեղվածներին հետ դարձնելու, դառնա առ աստված աղերս՝ փրկության և հավերժության:
Վստահեցնում ենք ձեզ, որ այսօր ողջ հայությունը Հայաստանում և Սփյուռքում սպասում է արցախահայության որոշմանը, և ժողովուրդն իր օրենսդիր ղեկավարության հետ միասին կայացրել է այդ որոշում-հայտարարությունը, ուստի մեզ մնում է, որ մեզանից դեն նետենք մեր միասնականությանն ու պայքարին խանգարող բոլոր տեսակի խոցելի երևույթները, հագնենք աստծո սպառազինությունը, հագնենք հավատքի պատմուճանը, վերցնենք առաքինությունների վահանն ու արդարության սուրը և դառնանք մեկ միասնություն, որը հարիր է արցախցիներին:
Միասնաբար բռնենք արցախյան շարժման ռահվիրանների ձեռքը՝ շարունակելու մեր արդար պայքարը:
Սիրելինե՛ր, այսօր մեր ազգը կանգնած է այնպիսի դժվարին փորձության առաջ, երբ դրված է մեր լինել -չլինելու, մեր ազգային արժանապատվության ու կորստի հարցը:
Մենք կյանքի և մահվան պայքարի մեջ ենք, և մեր ապրելու իրավունքը փորձում են որոշել առանց մեզ:
Չար ուժերը փորձում են Արցախը հայաթափել, որոշումներ կայացնել ոչ ի նպաստ մեզ և այս ամենին տալ չակերտավոր քաղաքակիրթ ձևակերպումներ, բայց մենք գիտենք, որ Արցախի հարցը սովորական հարց չէ, այն չարի և բարու, խավարի և լույսի պատերազմ է, քոչվորի և տեղաբնիկի հարց է, որն ուզում են լուծել գաղտնի և առանց մեզ:
Այսօր Արցախի հարցի լուծման միայն ու միայն մեկ տարբերակ կա՝ ազատ ու ինքնորոշված Արցախ: Ահա այս համոզումով է, որ մենք արդեն իսկ 30 և ավելի տարիներ ասում ենք՝ այո՛ ինքնորոշմանը:
Այսօր Արցախի կողքին լինել նշանակում է լինել արդարության և քաղաքակրթության կողքին: Սա է բանալին Արցախի հարցի լուծման՝ կանգնել ազգերի ինքնորոշման քաղաքակիրթ ձևաչափի կողքին: Ինչպես նախկինում, այնպես էլ այսօր հայ առաքելական սուրբ եկեղեցին կանգնած է արցախահայության կողքին իր ազգընտիր հայրապետով:
Աղոթում եմ, որ աստված օրհնի մեր միասնությունը, օրհնի մեր Արցախ աշխարհի և նրա ազատատենչ ոգին: Մեր շնորհակալությունն ու օրհնությունն ենք բերում Ռուսաստանի Դաշնության խաղաղապահ առաքելություն իրականացնող զորախմբին և հրամանատարությանը, որ ապահովում են մեր ամենօրյա կյանքն ու խաղաղությունը մեր հողում: Մեր երախտագիտությունն ենք հայտնում ռուս ուղղափառ եկեղեցուն, որ այսօր իր հոգևոր դեսպանատունն ունի Արցախում, որտեղ ամեն օր աղոթք է բարձրացվում Ռուսաստանի և Արցախի համար:
Լիահույս ենք, որ այս հոգևոր դեսպանության հենքի վրա վեր կխոյանան բարեկամական ևս երկու կարևոր կառույցներ՝ տնտեսական և քաղաքական ոլորտներում:
Սիրելի՛ հայրենակիցներ, եթե մենք լինենք միասնական և ապրենք աստվածահաճո կյանքով, ապա Աստված չի ուշացնի Արցախի փրկության օրը: Մտածենք այս ոգով և գործով այս հավատով:
Աստված օրհնի Արցախը և նրա հերոսական ժողովրդին:
Ամեն»: