Արցախում նշվել է Հայոց պետականության վերականգնման 100-ամյակը
Ստեփանակերտում Հայաստանի առաջին Հանրապետության հռչակման 100-ամյակի առիթով ԱՀ մշակույթի, երիտասարդության հարցերի և զբոսաշրջության նախարարությունը մի շարք միջոցառումներ է կազմակերպել:
Մայիսի 28-ին առավոտյան Ստեփանակերտի մշակույթի և երիտասարդության պալատի մուտքի մոտ կայացել է «Տատիս սնդուկը» հին իրերի, ձեռագործ աշխատանքների ցուցահանդես-վաճառքը: Արդեն երրորդ տարին կազմակերպվող ցուցահանդես-վաճառքին մասնակցում են Արցախի բոլոր շրջանների համայնքները:«Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանը նշել է, որ ցուցահանդեսի նպատակն է վերադառնալ արմատներին, որպեսզի ներկա սերունդը անտարբեր չվերաբերի նախնինների ունեցածին, իսկ ներկայացված նմուշները մինչև 200 տարվա պատմություն ունեն:
Նույն օրը Ստեփանակերտի մշակույթի և երիտասարդության պալատի երկրորդ հարկում տեղի է ունեցել «Արցախը 1918-1920թթ.» խորագրով ցուցահանդես: Ցուցահանդեսին ներկայացված էին նշված ժամանակահատվածի փաստաթղթեր և լուսանկարներ:
Ցուցահանդեսի առանձին մաս է կազմում «Արցախահայության մասնակցությունը մայիսյան հերոսամարտերին» խորագրով ցուցադրությունը: Բացելով միջոցառումը Արցախի պետական պատմաերկրագիտական թանգարանի տնօրեն Մելանյա Բալայանը նշել է, որ Արցախում առաջին անգամ է ներկայացվում նման ցուցահանդես:
«Անցել է մեկ դար, երբ մենք մեր հայրենիքի լավագույն զավակների արյան գնով կերտեցինք Հայաստանի Հանրապետությունը, որը տարբեր փոփոխություններով հասավ մինչև մեր օրերը, իսկ այսօրվա ՀՀ-ն և ԱՀ-ն առաջին Հանրապետության ծնունդն են ու շարունակությունը»,- իր խոսքում նշել է ԱՀ ՄԵՀԶ նախարար Սերգեյ Շահվերդյանը:
Իսկ երեկոյան Ստեփանակերտի մշակույթի և երիտասարդության պալատի դահլիճում կայացել է «Արցախ» ազգային նվագարանների նվագախմբի մենահամերգը: Ընդամենը երկու տարի գործող նվագախումբը 2016 թվականին մասնակցելով, Երևանում կայացած Ազգային նվագարանների անսամբլների համահայկական մրցույթ-փառատոնին, գրավել է առաջին մրցանակային տեղ: Գեղարվեստական ղեկավարը և գլխավոր դիրիժորը Լևոն Սարդարյանն է: Համերգի ընթացքում հնչել են ազգագրական, հայրենասիրական, աշուղական կատարումներ:
