Նաիրիան՝ հայկական լեռնաշխարհի բուրմունքով լի խանութ
Ցուցադարակներում խնամքով շարված սպիտակ փոքրիկ տուփերի ու բազմագույն օճառների վրա պատկերված վաղենակի, չիչխանի, խորդենու, ռեհանի ու թարխունի նուրբ անուշաբույրը հոտոտվում է հենց մուտքից: Դեկտեմբերի կեսին Ստեփանակերտում բացված՝ հայկական առաջին բնական կոսմետիկա արտադրող Նաիրիան ընկերության խանութը ժողովում է հայկական բուսաշխարհի ու մրգատեսակների «ներկայացուցիչներին»: Ընկերության Արցախի ներկայացուցիչ Նանար Շիրինյանը սիրով է ընդունում նյութ պատրաստելու մեր առաջարկը եւ պատմում Նաիրյանի հետ իր համագործակցության նախապատմությունն ու ապագա ծրագրերի գաղտնիքները բացում:
Մասնագիտությամբ տնտեսագետ Նանար Շիրինյանի՝ իր մաշկին համապատասխան խնամքի միջոցը գտնելու անվերջ փնտրտուքը երկու տարի առաջ հասցրեց նրան Երեւանի Թումանյան 34 հասցեում գտնվող Նաիրիան խանութ:
«Մարդու մաշկը հագուստ չէ եւ ոչ էլ զարդ. այն անփոխարինելի է: Այդ գիտակցումով պատվիրել եւ փորձել եմ բոլոր հայտնի եւ անհայտ կոսմետիկ միջոցները, եթերայուղերը: Սակայն ինձ գոհացնող միջոցը գտա Հայաստանում, հայկական արտադրության կոսմետիկայում: Նաիրիանը գրավել է ինձ հենց հայկական լինելու հանգամանքով»,- ասում է Շիրինյանը:
Խանութ այցելելու օրը դարձավ երկարածավալ որոնումների վերջնակետն ու նոր բիզնես-ծրագրի ելակետը: Ամուսնու հետ խորհրդակցելուց հետո որոշեց այցելել Նաիրիանի գրասենյակ՝ Արցախում մասնաճյուղ բացելու առաջարկով:
«Նաիրիանի Արագյուղի մշակովի բուրումնավետ դաշտերի կողքին գտնվող լաբորատորիա այցելելուց եւ կոսմետիկական բանաձեւերի մշակման պրոցեսը տեսնելուց հետո համոզվեցի, որ ճիշտ հասցեով եմ եկել: Ընկերության կոմերցիոն տնօրեն Լիլիթ Մարտիրոսյանն էլ սիրով ընդունեց առաջարկս եւ իմ՝ Արցախում Նաիրիանի ներկայացուցիչ նշանակվելու որոշումն ընդունվեց տեղում»,- պատմում է Նանարը:
Ամանորի նախաշեմին՝ դեկտեմբերի 15-ին է խանութն իր դռները բացել Արցախի հաճախորդների առջեւ: Նանարը մի շարք դասընթացներ է անցել՝ արտադրանքում ներառված յուրաքանչյուր բաղադրիչի բուժիչ հատկություններն ուսումնասիրելու նպատակով:
«Ամեն հաճախորդի ցուցաբերում ենք անհատական մոտեցում, եւ հաճախորդների հետ մեր կապը չի ավարտվում ապրանքի վաճառքով: Առցանց եւ հեռախոսակապի միջոցով մենք մշտական կապի մեջ ենք մեր հաճախորդների հետ, հատկապես՝ պրոբլեմատիկ մաշկ ունեցողների հետ,- ասում է Նանարը եւ շեշտում,- մեր նպատակը ոչ թե ապրանքատեսականին վաճառելն է, այլև արցախցիներին օգնելն ու գոհացնելը»:
Կարճ ժամանակահատվածում Նաիրիան խանութը ձեռք է բերել մշտական հաճախորդների անդավաճան շրջանակ: Նանարի խոսքով՝ գաղտնիքը արտադրանքի որակի ամենաբարձր չափանիշներն են:
«Մեր հայրենակիցները նախընտրում էին օգտագործել արտասահմանյան արտադրության կոսմետիկ միջոցները՝ մտածելով, որ եթե մերը չէ, ապա ավելի լավն է, որակյալ: Սակայն մեկ անգամ մեր արտադրանքը փորձելուց հետո մեր հաճախորդները համոզվել են, որ հայկական արտադրության միջոցները, մեր էկոլոգիան եւ բնությունը չեն կարող զիջել արտասահմանյանին»,- ասում է Արցախյան մասնաճյուղի ներկայացուցիչը:
Փոքրիկ խանութը նպատակների եւ ծրագրերի գագաթնակետը չէ: Նանարը նպատակ ունի հետագայում ընդլայնել խանութը: Բացի դրանից, ծրագրում է մշտական հաճախորդների նեղ շրջանակի համար այցելություն կազմակերպել Արագյուղ, որտեղ Նաիրիանի ընտրողները հնարավորություն կունենան մասնակցելու գարնանային վարդաքաղին, եթերայուղերի թորման եւ կորիզների ճզմման ընթացքին:
«Հորդորում եմ արցախցիներին նախապատվությունը տալ մերին՝ այդպիսով հարստացնելով եւ օգնելով մեր երկրին, որովհետեւ մերն ամենալավն է, ամենաբնականն է եւ անաղարտը: Եթե մենք դա հասկանանք եւ գիտակցենք, ապա Նաիրիանի արտադրության արտահանվող երկրների՝ ԱՄՆ, Ռուսաստան, Վրաստան, Հոնկոնգ, Կորեա եւ Մեծ Բրիտանիա շարքը է՛լ ավելի կընդլայնվի՝ այդպիսով ճանաչելի դարձնելով մերը, հայկականը:»,- եզրափակում է Նանար Շիրինյանը:
Լուսինե Թեւոսյան