Հայոց ցեղասպանության ճանաչման բանաձեւը Ներկայացուցիչների պալատում ունի 60 աջակից

ԱՄՆ Կոնգրեսի Ներկայացուցիչների պալատում Հայոց ցեղասպանության մասին ներկայացված «Ճշմարտություն եւ արդարություն» բանաձեւն այս պահին ունի 60 աջակից: Բանաձեւի հեղինակներն են կոնգրեսականներ Ադամ Շիֆը, Ռոբերտ Ջ. Դոլդը, Դեյվիդ Վալադաուն եւ Ֆրենկ Փալոնեն:

Հայ դատի ԱՄՆ հանձնախմբի փոխանցմամբ, բանաձեւում նշվում է, որ Հայոց ցեղասպանությունը մինչ օրս մնում է անպատիժ: Այն կոչ է անում ԱՄՆ նախագահ Բարաք Օբամային հայ-թուրքական հարաբերությունները կառուցել Թուրքիայի կողմից Հայոց ցեղասպանության ճանաչման հիմքով:

Հայ դատի հանձնախումբը կոչ է արել ԱՄՆ Կոնգրեսի Ներկայացուցիչների պալատի խոսնակ Փոլ Ռայանին բանաձեւն ընդգրկել Ներկայացուցիչների պալատի օրակարգում:

Նշենք, որ Հայոց ցեղասպանության մասին մյուս բանաձեւը, որը ներկայացրել են սենատորներ Ռոբերտ Մենենդեսը, Մարկ Քիրքը, Բարբարա Բոքսերը եւ Քորի Գարդները, այս պահին ունի 20 աջակից: