Ն. Փաշինյանի հետ հանդիպումը դրական էր.  Գասպար Կարապետյան

ՀՀ վարչապետ Նիկոլ Փաշինյանի՝ Բելգիայի թագավորություն կատարած այցի արդյունքների, Հայաստանում տեղի ունեցած հեղափոխության վերաբերյալ Եվրոպայի կարծիքի եւ ԵՄ—Հայաստան Համապարփակ եւ ընդլայնված համագործակցության համաձայնագրի շուրջ «Ապառաժ»-ը զրուցել է ՀՅԴ Եվրոպայի Հայ Դատի հանձնախմբի նախագահ Գասպար Կարապետյանի հետ:

— Վարչապետ Նիկոլ Փաշինյանը հուլիսի 11-13-ը աշխատանքային այցով Բելգիայի թագավորությունում էր: Ի՞նչ արդյունքների եւ ձեռքբերումների մասին կարող ենք խոսել:

— Որպես առաջին այցելություն եւ ծանոթացում ՆԱՏՕ-ի եւ Եվրոպական միության գործընկերների հետ՝ կարելի է ասել, որ անմիջական արդյունքներ չեն սպասվում, բայց ընդհանուր մթնոլորտը լավ էր: ՆԱՏՕ-ի եւ Եվրոպական միության անդամները լավ ընդունեցին Նիկոլ Փաշինյանին, խոստումներ եւս հնչեցին՝ Հայաստանին օժանդակություն ցուցաբերելու հետ կապված:

Հատկանշական է նաեւ այն համեմատականը, թե ինչպես Հայաստանում հնարավոր եղավ Թավշյա հեղափոխության միջոցով փոխել երկրում ստեղծված կացությունը, իսկ Ադրբեջանում գնալով կացությունը վատանում է՝ Ալիեւի դիկտատորական վարչակարգով: Կարծում եմ, որ դա մտածելու տեղիք է տալիս Ադրբեջանի նախագահ Ի. Ալիեւին, որ կարող է նույն մթնոլորտը իր երկրի մեջ էլ ստեղծվել: Ճիշտ հակասություն է ստեղծվել ժողովրդավարական արդյունքների վերաբերյալ Հայաստանի եւ Ադրբեջանի միջեւ:

— Բրյուսել եռօրյա այցի շրջանակներում վարչապետ Փաշինյանը հանդիպել է նաեւ Ձեզ հետ: Հետաքրքիր է՝ ի՞նչ օրակարգ էր ներառում հանդիպումը:

— Նիկոլ Փաշինյանը նախկինում, որպես ՀՀ խորհրդարանի պատգամավոր, այցելել էր մեր գրասենյակ եւ տեղյակ էր մեր կողմից կատարվող աշխատանքների մասին: Որպես ՀՀ վարչապետ՝ առաջին անգամ ենք հանդիպել: Հանդիպմանը ներկա էին նաեւ ՀՀ կրթության նախարարը եւ իր օգնականը: Հանդիպման ընթացքում խոսել ենք վերջին շրջանում մեր կատարած աշխատանքների մասին, Եվրոպական խորհրդարանում եւ ընդհանրապես ԵՄ-Հայաստան մերձեցման ուղղությամբ կատարվող աշխատանքների մասին:

Ն. Փաշինայնը ներկայացրել է իր առաջնահերթությունները մի շարք ուղղությունների համար:

Ասեմ, որ երկու անգամ հանդիպել ենք նաեւ ԱԳ նախարար Զոհրաբ Մնացականյանի հետ, քննարկել ընթացքի մեջ գտնվող զանազան հարցեր:

Ընդհանուր առմամբ՝ կարող եմ ասել, որ Ն. Փաշինյանի հետ հանդիպումը դրական էր, եւ մեր հարաբերությունները պետք է շարունակվեն:

— Պատահականությո՞ւն է արդյոք Հայաստանի եւ Ադրբեջանի ԱԳՆ ղեկավարների առաջին հանդիպումը Բրյուսելում կազմակերպելը, թե՞ հանդիպումը փաստում է, որ Լեռնային Ղարաբաղի հակամարտության խաղաղ կարգավորումը շարունակում է մնալ Եվրոպական միության առաջնահերթություններից մեկը:

— Պատահական՝ այն իմաստով, որ բոլոր կողմերը պետք է Բրյուսելում լինեին, եւ առիթը եղավ՝ նախաձեռնելու ԱԳ նորանշանակ նախարար Զոհրաբ Մնացականյանի առաջին հանդիպումը Ադրբեջանի ԱԳՆ ղեկավար Էլմար Մամեդյարովի հետ: Չեմ կարծում, որ առաջին հանդիպման ժամանակ խորքային խոսակցություն կամ լուրջ տեսակետներ փոխանակված լինեին:

Ինչ վերաբերում է Ղարաբաղյան հիմնախնդրի՝ ԵՄ օրակարգում լինելուն, չեմ կարծում, որ Լեռնային Ղարաբաղի հակամարտության խաղաղ կարգավորման գործընթացը Եվրոպական միության առաջնահերթություններից է: Անշուշտ, Եվրոպան կարեւորում է Արցախյան հարցը՝ Հայաստանի հետ բարիդրացիական հարաբերությունների մեջ լինելու տեսանկյունից, բայց ոչ որպես իրենց անմիջական առաջնահերթություն:

— Կարո՞ղ ենք համարել, որ Եվրախորհրդարանի ձայների գերակշիռ մեծամասնության հավանությանն արժանացած ԵՄ—Հայաստան Համապարփակ եւ ընդլայնված համագործակցության համաձայնագիրը Հայաստանի արտաքին քաղաքականությունում կարեւորագույն ձեռքբերումներից է:

— Այո, ամենակարեւոր ձեռքբերումներից է, մանավանդ Հայաստանի՝ 2013-ին համաձայնագիրը չստորագրելու որոշումից հետո: Հայաստանն այդ ժամանակ գրեթե մեկուսացման մեջ հայտնվեց: Մեծ պայքար ենք տարել այն ժամանակվա արտաքին գործերի փոխնախարարի հետ՝ Հայաստանին դուրս բերելու մեկուսացումից եւ հասկացնելու եվրոպացիներին, որ մեկուսացումը որեւէ կողմի համար շահավետ չէ: Այդ ուղղությամբ մեր աշխատանքն արդյունք տվեց, եւ համաձայնագիրը ստորագրվեց:

Համաձայնագրի ստորագրումը կարեւոր է Հայաստանի համար, մանավանդ այն տեսանկյունից, որ համաձայնագրի հիման վրա Հայաստանում կկատարվեն ներքին փոփոխություններ եւ նաեւ առիթ կստեղծեն՝ Եվրոպայի կողմից Հայաստանին հատկացվող միջոցների եւ նյութական օժանդակությունների բարձրացման:

— Ինչպիսի՞նն է Եվրոպայի արձագանքը եւ վերաբերմունքը Հայաստանում տեղի ունեցած հեղափոխության վերաբերյալ եւ ինչպե՞ս են այդ փոփոխություններն ազդել Հայաստան—Եվրամիություն հարաբերությունների վրա:

— Լսածս եւ հանդիպումների ընթացքում հնչած բոլոր կարծիքները հայ ժողովրդի հասունության եւ ճիշտ կերպով հարցը լուծելու հիացական արձագանքներ էին: Այսօր Հայաստանում որոշ գործընթացներ են սկսվել, որոնք պետք է շարունակական լինեն: Ե՛վ կառավարությունը, ե՛ւ կառավարության աշխատակիցները պետք է զգույշ լինեն իրենց ասածների եւ հայտարարությունների մեջ, տաքարյուն քննարկումներ եւ քննադատություններ չանեն՝ ակնկալելով, որ այսօր խոստացվածը վաղը պետք է իրագործվի:

Պետք է զինվենք համբերությամբ, սպասենք խորհրդարանական արտահերթ ընտրություններին՝ երկրի քաղաքական պատկերը հստակեցնելու համար: Կարծում եմ, որ եթե երկու կողմից հասունություն լինի, երկիրը լավ ընթացքի մեջ կընկնի:

Լուսինե Թեւոսյան