Մայրենի լեզվին նվիրված միջոցառում ԱրՊՀ-ում
Փետրվարի 21-ը Մայրենի լեզվի օրն է:
Օրվա կապակցությամն այսօր Արցախի պետական համալսարանում կայացել է միջոցառում:
Միջոցառմանը ներկա էին ԼՂՀ կրթության, գիտության եւ սպորտի նախարար Սլավա Ասրյանը, փոխնախարար Արմեն Սարգսյանը, դասախոսներ, ուսուցիչներ, ուսանողներ եւ հյուրեր:
Փոխնախարար Արմեն Սարգսյանն իր ելույթում նշել է, որ հայերիս համար մայրենին ի սկզբանե ու մինչ այսօր եղել է եւ կմնա մեր անկախության եւ գոյատեւման գլխավոր գրավականը:
ԼՂՀ ԿԳ և սպորտի նախարարության լեզվի պետական տեսչության պետ Արտակ Ղուլյանը ցավով նշել է, որ արեւմտահայերենը վերացման եզրին է եւ այսօր հայտնվել է լեզուների կարմիր գրքում:
<<Ամեն մի ժամանակաշրջանում մենք բախվում ենք նոր մարտահրավերների: Մենք պետք է հարգենք մեր լեզուն, ավելի խնամքով վերաբերենք նրան, գրենք ու խոսենք մեր ոսկեղենիկ մայրենիով: Սիրենք ու փայփայենք մեր լեզուն, որովհետև հայոց լեզուն հենց մենք ենք>>,- նշել է Ա.Ղուլյանը:
Ստեփանակերտի տարբեր դպրոցների աշակերտներ եւ ուսանողներ հանդես են եկել մայրենիին նվիրված բանաստեղծություններով:
Միջոցառման ընթացքում ելույթ են ունեցել նաեւ Ստեփանակերտի մանկապատանեկան ստեղծագործական կենտրոնի սաները:
Մի շարք լրագրողներ և դասախոսներ մայրենին անաղարտ պահելու համար ԼՂՀ ԿԳ և սպորտի նախարարության լեզվի պետական տեսչության կողմից արժանացել են պատվոգրերի և նվերների:
