Փոխվարչապետը կարեւորում է համայնքապետերի համար կազմակերպվող դասընթացները
Նոյեմբերի 3-ին ԼՂՀ փոխվարչապետ Արթուր Աղաբեկյանը հանդիպել է համայնքների ղեկավարների համար կազմակերպվող շարունակական դասընթացների այս տարվա վերջին խմբի մասնակիցների հետ:
Հանդիպման ժամանակ փոխվարչապետը կարեւորել է կառավարության նախաձեռնությամբ անցած տարի մեկնարկած ծրագիրը՝համայնքների ղեկավարների գիտելիքների ամրապնդման, օրենսդրական դաշտի փոփոխություններին ու լրացումներին ծանոթանալու, համայնքային նշանակության խնդիրներն ի մի բերելու եւ ընդհանուր լուծումներ գտնելու տեսանկյուններից: Ա. Աղաբեկյանի համոզմամբ` ստանալիք գիտելիքներն իրենց ազդեցությունն են թողնելու համայնքների սոցիալ-տնտեսական զարգացման եւ կառավարման արդյունավետության բարձրացման գործում :
Փոխվարչապետ Արթուր Աղաբեկյանը համայնքապետերին խորհուրդ է տվել դասընթացների ժամանակ լինել ակտիվ եւ ստանալ իրենց հուզող խնդիրների պարզաբանումները՝ հատկապես բյուջեի ձեւավորման գործում իրենց դերակատարությունը բարձրացնելու հարցում: Փոխվարչապետը հորդորել է համայնքային ավագանիների հետ քննարկել բյուջեի կազմման հարցերը, ուշադիր լինել տեղական տուրքերի գանձման ուղղությամբ, որպեսզի սեփական բյուջեի մուտքերը ավելանան, եւ հնարավոր լինի համայնքային հարցերը լուծել առանց պետական դոտացիաների:
Ա. Աղաբեկյանը, ներկաներին տեղեկացնելով մի շարք համայնքներում սանմաքրման ուղղությամբ իրականացվող փորձնական ծրագրերի մասին, հորդորել է կարգավորել իրենց բնակավայրերի սանիտարական դրությունը՝ հատուկ աղբատեղեր ունենալ եւ հետեւել աղբահանության ընթացքին: