Սումգայիթյան եղեռնագործության հիշատակի օրը
1988 թվականի փետրվարից հետո «Սումգայիթ» անունն ասոցացվում է մարդկային ամենաստոր հանցագործությունների, բռնարարքների հետ:
Այսօրը միլիոնավոր հայեր Արցախում, մայր Հայաստանում ու Սփյուռքի բոլոր հայկական գաղթօջախներում խնկարկում են սումգայիթյան ցեղասպանության հիշատակի օրը: Երեք օրվա ընթացքում Սումգայիթի 18 հազար հայեր մազապուրծ փախան այն քաղաքից, որն իրենք էին կառուցել:
Փետրվարի 28-ին սումգայիթյան եղեռնագործության հիշատակի օրը հուշարձանին ծաղիկներ խոնարհեցին Արցախի Հանրապետության նախագահը, Ազգային ժողովի պատգամավորներ, մտավորականության ու ուսանողության ներկայացուցիչներ:
«Ադրբեջանական խառնամբոխը գործում էր մարդկային բանականության ու բարոյական բոլոր նորմերին հակառակ: Մենք խոսել ու շարունակելու ենք արտահայտվել սումգայիթյան եղեռնի առայսօր դեռևս պատշաճ գնահատական չտրված լինելու հանգամանքի մասին: Մենք ականատես ենք լինում, որ հայատյացությունը ոչ միայն չի պակասում, այլև ադրբեջանական իշխանությունների կողմից ավելի ու ավելի է բորբոքվում սահմանում սադրանքների տեսքով»,- ասաց Արցախի արտգործնախարար Կարեն Միրզոյանը:
Իսկ ԱԺ փոխնախագահ Վահրամ Բալայանը նշեց. «Ամեն տարի մենք մեր հարգանքի տուրքն ենք մատուցում Սումգայիթում և ընդհանրապես Ադրբեջանի մյուս շրջաններում բռնարարքների ենթարկված մեր հայրենակիցների հիշատակը հարգելու համար: Ընդհանուր առմամբ մեզ համար զարմանալի չէ Ադրբեջանի անմարդկային վարվելակերպը, հայատյացությունը թե՛ մուսավաթական Ադրբեջանի, թե՛ խորհրդային Ադրբեջանի և թե՛ ալիևյան կլանին պատկանող Ադրբեջանի իշխանությունների կողմից: Ինչպես ասում են՝ ձեռագիրը չի փոխվել և այսօր էլ շարունակվում է: Սումգայիթում կատարված չարագործությունները նորից ու նորից վկայեցին, որ հայությունը պետք է ունենա իր ազգային-պետական միավորումը, որովհետև միայն ու միայն իր ազգային- պետական միավորման ներսում և նրա միջոցով կարելի է դիմակայել ամեն դժվարության, կերտել մեր պետականությունն ու դիմակայել մարտահրավերներին»:
«Ապառաժ»