Միայն ուժեղ պետություն ունենալու դեպքում իրավունք կունենանք խոսել նոր հաղթանակների մասին.Սամվել Թադեւոսյան
«25 տարի առաջ այս օրը մեր ազգի հավաքական ներդրման արդյունքն էր: Գյուղացին, բժիշկը, գիտնականը, զինվորը, սփյուռքահայը, բարերարը համախմբվեցին՝ Արցախի հողը ազատագրելու համար եւ Շուշիի հաղթանակով սկսվեց մեր հաղթարշավը,- «Ապառաժ»-ի թղթակցի հետ զրույցում ասել է սցենարիստ, ռեժիսոր Սամվել Թադեւոսյանը:
Ս. Թադեւոսյանի խոսքով՝ մենք պետք է զգոն եւ սթափ կշռադատենք կատարվելիքը:
«Մենք պետք է համախմբենք մեր ուժերը, հավատարիմ լինենք մեր կոչմանը, մեր առաքելությանը եւ մտավախությամբ մոտենանք թվացյալ դաշնակիցներին: Աշխարհը չի պարկեշտացել, ամեն մեկն իր գործերով է զբաղված եւ արտաքուստ սիրալիր ժպիտների տակ օձեր են թաքնված, որոնք թվում է թե մեզ բարեկամ են, բայց մեզ խոցում են դիմացից, թիկունքից: Նենգության բոլոր օրենքներով,- ասել է Սամվել Թադեւոսյանը եւ շեշտել,- հողը եթե քրտնինքով, սիրով չես ջրում, խռովում է քեզանից, ճաքճքում եւ անցնում թշնամու ձեռքը: 1991-ին մենք ապավինեցինք մեր ուժերին, պայքարեցինք մեր անկախության համար եւ հաղթեցինք: Այսօր միայն ուժեղ պետություն ունենալու դեպքում իրավունք կունենանք խոսել նոր հաղթանակների մասին»: