Մասնագիտության ճիշտ ընտրությունը հասարակական խնդիր է
Մասնագիտության ճիշտ ընտրության հարցը երիտասարդի կյանքում ծառացած խնդիրներից ամենալուրջն է: Ճիշտ ընտրությունը կարող է բախտորոշ աստղի պես լուսավորել նրա ողջ կյանքը, իսկ սխալ ընտրությունն, ընդհակառակը, դժբախտություն բերել: Որքան էլ որ հասարակությունը, ընտանիքն օգնեն երիտասարդին, միեւնույն է, վերջնական որոշումն ինքը պիտի կայացնի,ապավինելով իր ներքին ձայնին, համոզմունքներին ու ունակություններին: Սակայն երիտասարդների երբեմն անլուրջ վերաբերմունքը կամ փորձի պակասը կամ էլ ինչ-ինչ հանգամանքներ խոչընդոտում են ճիշտ ուղի ընտրելուն: Խոչընդոտները կարող են լինել ամենատարբեր բնույթի՝ ասենք ծնողի ցանկությունը, որը կարող է չհամընկնել որդու կամ դստեր ունակություններին կամ էլ՝ մոդայիկ համարվող մասնագիտությունների ետեւից ընկնելը, առանց հաշվի առնելու երիտասարդի անձնական հակումները: Մի քանի տարի անընդմեջ մոդայիկ էին համարվում իրավաբանականն ու տնտեսագիտականը: Հիմա չգիտենք, թե որտեղ տեղավորենք նրանց: Պարզվեց, որ նրանք եւ ժամանակն էին իզուր վատնել (4-5 տարին երիտասարդի համար քիչ ժամանակահատված չէ) եւ ծնողների հույսերն են ի դերեւ եղել, եւ ֆինանսական միջոցներն են իզուր ծախսվել: Կյանքում իր տեղը ճիշտ գտնելը, իր սեփական եսին եւ հասարակությանը բավարարություն բերելը մեծագույն երջանկություն է, որը, ցավոք, միշտ չէ, որ հաջողվում է:
Մասնագիտության ընտրության հարցը բավական մանրամասն սոցիոլոգիական հետազոտությունների կարիք ունի, ընդ որում հետազոտությունները պետք է կատարվեն երկկողմանի, հաշվի առնելով աշխատաշուկայի պահանջները եւ երիտասարդության նախապատրաստվածության աստիճանը:
Ինչպիսինն է պատկերը Արցախի բուհերում. ԼՂՀ ԿԳՍ նախարարության մասնագիտական կրթության եւ գիտության բաժնի տվյալներով, 2016-2017 ուս. տարում Արցախի տարբեր բուհերի առկա բաժիններ է ընդունվել 692 ուսանող (ներառյալ ՀՀ –ում մրցույթային կարգով հատկացված տեղերը): Ընդ որում, ԱրՊՀ-ում ընդունվել է 474 ուսանող, երկրորդ տեղում է Շուշիի տեխնոլոգիական համալսարանը՝ 78 ուսանող: Մասնագիտությունների ընտրության հարցում հետեւյալ պատկերն է. ամենաշատը առավելություն է տրվել ԱրՊՀ-ում «Հայոց լեզու եւ գրականություն» մասնագիտությանը, իսկ Շուշիի տեխնոլոգիական համալսարանում՝ գյուղատնտեսության ոլորտին առնչվող մասնագիտություններին՝ 53 ուսանող: Ցավալիորեն պետք է արձանագրենք այն փաստը, որ առաջին կուրսում ուսանողներ չկան այնպիսի առարկաներից, ինչպիսինն է քիմիան եւ հոգեբանությունը:
Լիլիա Բաղրյան