Ճանապարհաշինություն՝ դեպի ոչ քարքարոտ ապագա
Միջհամայնքային եւ գյուղամիջյան ճանապարհների բարեկարգման խնդիրը մնում է 26-ամյա անկախ Արցախի ամենաքննարկվող ու հրատապ հարցերից մեկը: Անծայրածիր ու ահռելի թվացող ծրագիրը, սակայն, վերջին ամիսներին նոր թափ է ստացել՝ շնորհիվ Կառավարության նոր ծրագրերի: Միջհամայնքային ճանապարհները բարեկարգվում են խճապատման տարբերակով, ներհամայնքային ճանապարհները՝ խորանարդ սալիկների/ քարերի սալապատման եղանակով:
Ներհամայնքային ճանապարհների բարեկարգում սալապատման եղանակով
Ըստ Արցախի քաղաքաշինության նախարարության տրամադրած վիճակագրության՝ ավելի քան հինգ գյուղերում ավարտվել են սալապատման աշխատանքները: Աշխատանքները շարունակվում են Արցախի շուրջ 30 համայնքներում:
«Գյուղամիջյան ճանապարհների խորանարդ սալիկներով դարսումը լավագույն տարբերակն է, քանի որ դրանց ինքնարժեքը եւ երկարակեցության հարաբերությունն ավելի բարձր է, քան ասֆալտինը»,- իր խոսքում նշել է Արցախի քաղաքաշինության նախարար Կարեն Շահրամանյանը:
Դիմիր կառավարությանը, ստացիր խորանարդ սալիկները/քարերը եւ աշխատավարձի դիմաց բարեկարգիր հայրենի գյուղի ճանապարհը: Այսպիսինն է նոր ծրագիրը, որն ապահովում է նաեւ գյուղացիների ժամանակավոր զբաղվածությունը:
Ծրագիրն իրականացվում է Արցախի կառավարության եւ Արցախում գործող մի շարք բարեգործական հիմնադրամների ֆինանսավորմամբ: Անցած տարվա համեմատ՝ այս տարի զգալի աճել է նաեւ ծրագրից օգտվել ցանկացողների թիվը:
«Այս տարի ճանապարհաշինության ծրագրին հատկացվել է 300 մլն դրամ: Նախնական հաշվարկներով՝ 10 տարվա ընթացքում պետք է ավարտենք Արցախի բոլոր գյուղերի գյուղամիջյան ճանապարհների բարեկարգման աշխատանքները»,- նշել է Կ. Շահրամանյանը՝ ավելացնելով, որ միջհամայնքային ճանապարհների ավելի քան 250 կիլոմետրը արդեն սալապատված է:
Միջհամայնքային ճանապարհների բարեկարգում խճապատման տարբերակով
Արցախի շուրջ 230 համայնքներից 50 տոկոսի կենտրոնական ավտոմայրուղուց գյուղ տանող ճանապարհը խճապատված է: Այս պահի դրությամբ աշխատանքներ են իրականացվում Հադրութի շրջանի Խծաբերդ եւ Մարտունու շրջանի Աշան գյուղերում։
Արցախի բոլոր շրջաններում խճապատման աշխատանքներ իրականացնելու նպատակով «Արցախուղի» ՓԲԸ-ին տարվա կտրվածքով հատկացվել է 353 մլն դրամ։
«Քիչ գումար է, բայց մինչեւ տարվա վերջ կավելացվի եւս 200 միլիոն»,- ասել է Կարեն Շահրամանյանը եւ ընդգծել, որ ծրագիրը շարունակական է, քանի որ հորդառատ անձրեւների պատճառով ճանապարհների խճապատման տարբերակը պահպանվում է միայն երկու-երեք տարի:
Այս տարի նախատեսվում է բարեկարգել նաեւ Մուշկապատի, Հաղորտու եւ Վարանդայի ճանապարհները։
Լուսինե Թեւոսյան