Ղարաբաղում չկան օկուպացված տարածքներ, իսկ Թուրքիան անելիք չունի Արցախյան գործընթացում. Շարմազանով
Թուրքիայի պաշտպանության նախարար ևս մեկ անգամ ապացուցեց, որ Թուրքիան անելիք չունի Արցախյան գործընթացում: Այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը՝ անդրադառնալով Թուրքիայի պաշտպանության նախարար Նուրեթթին Ջանիքլիի այն հայտարարությանը, թե «Արցախն ադրբեջանական հող է, և այն պետք է ազատագրել Հայաստանի օկուպացիայից»։
Նրա խոսքերով՝ Թուրքիան հստակ ադրբեջանամետ ուղղվածություն ու կարծիք ունի, թե ռազմական, թե քաղաքական, թե տնտեսական օժանդակություն է ցույց տվել Ադրբեջանին, և Թուրքիան այն երկիրն է, որը սատարել է Ադրբեջանի հանցագործ քաղաքականությունը ապրիլյան պատերազմի ժամանակ:
«Այս հայտարարությամբ Թուրքիայի պաշտպանության նախարարը ևս մեկ անգամ ապացուցեց, որ Ադրբեջանը ոչ այլ ինչ է, քան երկրորդ թուրքական պետություն, որն առաջացել է քարտեզի վրա 1918 թ-ի մայիսի 27-ին թուրք Նուրի փաշայի զինվորական ինտերվեցիայի արդյունքում: Ինչ վերաբերում է օկուպացված տարածքներին, Ղարաբաղում չկան օկուպացված տարածքներ, Ադրբեջանն է օկուպացրել Արցախի տարածքները, իսկ Թուրքիան բոլորի աչքի առաջ օրը ցերեկով օկուպացրեց ԵՄ անդամ երկրի՝ Կիպրոսի 38 տոկոսը: Ով ով, բայց գոնե Թուրքիան չպիտի խոսի օկուպացիայից»,-ընդգծեց ԱԺ փոխնախագահը: