Հացի համայնքն ունի նոր հանդիսությունների սրահ
Մարտունու շրջանի Հացի համայնքի բնակիչներն այլեւս ստիպված չեն լինելու իրենց միջոցառումները գյուղից դուրս կազմակերպել: Հայրենի գյուղի ապագան ուրվագծող բարերար Նելսոն Սարգսյանը հերթական բարեգործությունն է բերել՝ նոր հանդիսությունների սրահ:
«Վերջին շրջանում սովորություն է դարձել ուրախության միջոցառումները՝ հարսանիքը, կնունքը, ծնունդը, Ստեփանակերտում նշելը: Ինձ համար դա խորթ էր եւ անընդունելի»,- նշում է բարերար Նելսոն Սարգսյանը:
Հանդիսությունների սրահի կառուցման ծրագիրը Նելսոն Սարգսյանի առաջին ծրագիրը չէ: 2-րդ համաշխարհային պատերազմի եւ Արցախյան ազատամարտում ընկածների հիշատակին կառուցված հուշահամալիրը նույնպես իր գաղափարն էր եւ մայիսի 1-ին կայացած հանդիսությունների սրահի պաշտոնական բացման արարողությունը սկսվել է հենց այնտեղից:
Միջոցառմանը ներկա ԼՂՀ ԱԺ փոխնախագահ Վահրամ Բալայանը, ԼՂՀ ԱԺ «Դաշնակցություն» խմբակցության մի շարք պատգամավորներ, կառավարության անդամներ, բարերարի ընտանիքը, հյուրերը եւ համագյուղացիները ծաղիկներ են խոնարհել հուշահամալիրում եւ հարգել հանուն հայրենիքի ընկածներին:
Հանդիսությունների սրահի կարմիր ժապավենը կտրել են բարերարն ու Հացի համայնքի ղեկավարը: Այնուհետեւ հյուրերի եւ ամբողջ գյուղի բնակիչների համար նախատեսվել է հյուրասիրություն՝ ՀՀ վաստակավոր արտիստներ՝ Մկրտիչ Մկրտչյանի, Արսեն Գրիգորյանի եւ «Մենք ենք մեր սարերը» ազգագրական երգի-պարի պետական համույթի մասնակցությամբ: Ուրախության սեղանի գլխովոր կենացը՝ գյուղը շեն պահող մարդկանց կենացն էր՝ բարերարի գլխավորությամբ:
Նորաբաց հանդիսությունների տան առաջին տոնախմբությունը սկսել են կատարվածի գնահատականով: Նելսոն Սարգսյանն արժանացել է Վարչապետի հուշամեդալին: Գործարարը վստահեցրեց, որ այսպիսով չի ավարտելու իր աշխատանքները Հացիում:
Իսկ մինչ մեծերը հավաքվել էին սեղանի շուրջ, հացեցի փոքրիկները, ուտելիքը ձեռներին, շտապում էին բնության գրկում ուրախությունը տոնելու:
Հ.Գ.Հացեցի 5 զույգ ամռանը պատրաստվում է ընտանիք կազմել՝ հանուն վաղվա վառ գալիքի: