Հանդիպում Լոս Անջելեսում՝ հայ ավանդական կուսակցությունների անդամների հետ
ԼՂՀ Ազգային Ժողովի նախագահ Աշոտ Ղուլյանը նոյեմբերի 17-ին Լոս Անջելեսում հանդիպում է ունեցել Սոցիալ-դեմոկրատական Հնչակյան կուսակցության Արևմտյան Ամերիկայի վարչական մարմնի անդամների հետ` ատենապետ Վազգեն Խոդանյանի գլխավորությամբ:
Հաջորդ հանդիպումը տեղի է ունեցել Ռամկավար Ազատական կուսակցության Արևմտյան Ամերիկայի շրջանային վարչության պատասխանատուների հետ` ատենապետ Հակոբ Նազարյանի գլխավորությամբ:
Արցախի խորհրդարանի նախագահը հանդիպում է ունեցել նաև ՀՅԴ Արևմտյան Ամերիկայի Կենտրոնական կոմիտեի պատասխանատուների հետ` Վիգեն Հովսեփյանի գլխավորությամբ:
Ավանդական կուսակցությունների ներկայացուցիչների հետ քննարկվել են Արցախի Հանրապետության ներկա սոցիալ-տնտեսական իրավիճակը, տարածաշրջանային վերջին զարգացումները և Արցախ-Սփյուռք համագործակցության հեռանկարին վերաբերող հարցեր:
Հայ ավանդական կուսակցությունների պատասխանատուները տեղեկացրել են, որ արդեն իրենց կոչն են ուղղել համախոհներին` “Հեռուստամարաթոն-2012”-ին մասնակցելու ուղերձով և հավաստիացրել են Արցախի զարգացման ծրագրերին օժանդակելու իրենց պատրաստակամության մասին:
Հանդիպումներին մասնակցում էին Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԱՄՆ-ում և Կանադայում ԼՂՀ մշտական ներկայացուցիչ Ռոբերտ Ավետիսյանը և ԼՂՀ ԱԳՆ բազմակողմ հարաբերությունների վարչության պետ Արմինե Ալեքսանյանը:
Օրվա երկրորդ կեսին ԼՂՀ Ազգային ժողովի նախագահը հանդիպում է ունեցել բարերար Անդո Բաղդասարյանի հետ: Զրույցի ընթացքում քննարկվել են առաջիկա հեռուստամարաթոնի ուղղվածության, ինչպես նաև Արցախի տնտեսական զարգացման հետ առնչվող հարցեր:
Հանդիպմանը մասնակցում էին նաև «Հայաստան» Համահայկական հիմնադրամի գործադիր տնօրեն ԱրաՎարդանյանը և կազմակերպության ԱՄՆ Արևմտյան ափի գործադիր տնօրեն Սարգիս Քոթանջյանը: