Հայոց ցեղասպանության ժխտումը քրեականացնող օրինագիծը կրկին Ֆրանսիայի խորհրդարանում է
Ֆրանսիայի խորհրդարանում կրկին կքննարկվի Հայոց ցեղասպանության ժխտումը քրեականացնող օրինագիծ: Մարսել քաղաքից ընտրված պատգամավոր Վալերի Բուայեն նոր «Հայոց ցեղասպանության ժխտումը քրեականացնող» օրինագիծ է ներկայացրել խորհրդարան:
Ըստ օրինագծի՝ նախատեսվում է 5 տարվա ազատազրկում եւ 45 հազար եվրո տուգանք պատժաչափ:
Բուայեն նոյեմբերի 4-ին, 23 պատգամավորի ստորագրությամբ, օրինագիծը հանձնել է Ֆրանսիայի Ազգային ժողովի ղեկավարությանը:
Ֆրանսիայի խորհրդարանի պատգամավոր Վալերի Բուայեն թուրքական «Ջիհան» գործակալության հետ հարցազրույցում հույս է հայտնել, որ օրինագիծը շուտով կհայտնվի խորհրդարանի օրակարգում եւ նշել է. «Միջին Արևելքում տեղի ունեցող իրադարձությունները պարտավորեցնում են պատրաստել այս նախագիծը: Սիրիայում և Իրաքում ազգային փոքրամասնություններն ու քրիստոնյաները ցեղասպանության են ենթարկվում:»:
Իր հարցազրույցում ֆրանսիացի պատգամավորը նաեւ շեշտել է, որ Ֆրանսիայի նախագահ Ֆրանսուա Օլանդն անցած տարվա ապրիլի 24-ին՝ Հայոց ցեղասպանության զոհերի հիշատակի օրը, խոստում է տվել և կկատարի այն:
Վալերի Բուայեն նաեւ հայտարարել է, որ նոր օրինագիծն ուղարկել է խորհրդարանում ներկայացված բոլոր կուսակցություններին եւ արդեն 40-ից ավելի պատգամավորներ, իրենց ստորագրությամբ, աջակցություն են հայտնել նոր օրենքի նախագծին:
Հիշեցնենք, որ Բուայեի պատրաստած Հայոց ցեղասպանության ժխտումը քրեականացնելու վերաբերյալ օրենքի նախորդ նախագիծն ընդունվել էր Ֆրանսիայի խորհրդարանի և Սենատի կողմից, սակայն երկրի Սահմանադրական խորհուրդն այն սահմանադրությանը հակասող էր ճանաչել: