Հայաստանի Հանրապետութեան 100-ամեակին նուիրուած գիտաժողով
Հայ Յեղափոխական Դաշնակցութեան հիւսիսային Ամերիկայի արեւելեան շրջանի կազմակերպութեամբ, Նիւ Եորքի Գոլոմպիա համալսարանին մէջ Մայիս 11 եւ 12, 2018-ին տեղի պիտի ունենայ գիտաժողով որուն պիտի մասնակցին մասնագիտացած նշանաւոր փրոֆէսօրներ։
Հայաստանի առաջին հանրապետութեան հիմնադրութեան հարիւրամեակին նուիրուած այս գիտաժողովը կը հովանաւորեն Գոլոմպիա համալսարանի հայկական ամպիոնը, հայկական նիւթերու ուսումնասիրութեան եւ հետազօտութեան ազգային հիմնարկը (NAASR) եւ «Armenian Review» պարբերաթերթը:
Այս գիտաժողովին պիտի մասնակցին Լոս Անճելըսէն՝ փրոֆէսօր Ռիչըրտ Յովհաննիսեան, Ֆրանսայէն՝ փրոֆէսօրներ Անահիտ Տէր Միանասեան եւ Գլէր Մուրատեան, Հայաստանէն՝ փրոֆէսօր Աշոտ Մելքոնեան, Պէյրութէն՝ պատմաբան Երուանդ Փամպուքեան, ինչպէս նաեւ կարգ մը ուրիշ հանրածանօթ մտաւորականներ եւ հայագէտներ։
Ըստ գիտաժողովի ատենապետ՝ Անդրանիկ Գասպարեանին, բացման նիստը տեղի պիտի ունենայ ուրբաթ երեկոյեան, մասնակցութեամբ բոլոր դասախօսներուն, նիւթ ունենալով «Առաջին Հանրապետութիւնը հարիւր տարի ետք»։ Շաբաթ օրը տեղի պիտի ունենան զանազան նիստեր հայերէն եւ անգլերէն լեզուներով։
Շաբաթ օրուան կէսօրուայ ճաշի նիստին փրոֆ. Յովհաննիսեանի դասախօսութեան նիւթն է՝ « Յիսնամեայ գիտական ուսումնասիրութեան Հայաստանի Հանրապետութեան մասին»։
Յառաջիկային մանրամասնութիւններ պիտի տանք մամուլով, այս գիտաժողովին նիւթերուն մասին եւ դասախօսներու անունները պիտի յայտարարենք։
Հոս տեղին է յիշել թէ այս գիտաժողովը մաս կը կազմէ 2018 թուականին Հայաստանի եւ սփիւռքի մէջ տեղի ունենալիք Ա. Հանրապետութեան հարիւրամեակին նուիրուած ձեռնարկներուն։