Համերգ` նվիրված Մոնթեի ծննդյան տարեդարձին
Ստեփանակերտի Ստեփան Շահումյանի անվան պուրակում նոյեմբերի 24-ին կայացավ <<Արցախ>> ազգագրական պարի նախաձեռնության անդրանիկ համերգը: Ըստ համույթի գեղարվեստական ղեկավար Սարգիս Պարսամյանի` <<Արցախ>> ազգագրական պարի նախաձեռնության անդրանիկ համերգը համույթը նվիրում է Արցախի հերոս Մոնթե Մելքոնյանի ծննդյան 56 ամյակին:
<<Սկբնական շրջանում նպատակ չունեինք նմանօրինակ նախաձեռնություն դառնալու, խուբն ի սկզբանե սիրողական էր, սակայն հետո որոշեցինք մեր առջեւ ավելի բարձր նպատակներ դնել եւ հասնել դրանց>>,- նշեց համույթի ղեկավարը:
Չնայած այն հանգամանքին, որ համույթի մասնակիցները 2 ամիս է, ինչ սովորում են ազգագրական պարեր, սակայն համերգին համույթի ներկայացրած պարացանկը բավականին հարուստ էր: Համերգի ժամանակ համույթը ներկայացրեց գյովնդ-վերվերի, թամզարա, փափուռի, մածուն, շորոր, սասնա քոչարի եւ քերծի պարերը:
Պարացանկը ներկայացնելուց հետո տեղի ունեցավ պարուսուցման պրոցես, որին անկախ տարիքային սահմանափակումից մասնակցեցին բոլոր ցանկացողները: Ի դեպ, համույթի կազմում նույնպես տարիքային սահմանափակում չկա:
<<Արցախ>> ազգագրական պարի նախաձեռնության ղեկավար Սարգիս Պարսամյանը չբացառեց այն հանգամանքը, որ առաջիկայում համույթը որոշակի խնդիրներ հաղթահարելուց հետո համերգային շրջագայություն կունենա Արցախի շրջաններում:
