Համագործակցության համաձայնագիր Ստեփանակերտի և Դոնոստիայի (Սան Սեբաստիան) միջև (տեսանյութ)
Բասկերի երկրում աշխատանքային այցով գտնվող Արցախի Հանրապետության արտաքին գործերի նախարար Կարեն Միրզոյանը սեպտեմբերի 13-ին հանդիպել է Բասկրի Երկրի Դոնոստիայի (իսպաներեն՝ Սան Սեբաստիան) քաղաքի քաղաքապետ Խուան Կառլոս Իզագիրե Օրտելանոյի հետ։
Հանդիպման ժամանակ մտքեր են փոխանակել Ստեփանակերտի և Դոնոստիայի միջև բարեկամական և գործնական փոխշահավետ հարաբերությունների հաստատման և զարգացման հեռանկարների շուրջ։
Ստեփանակերտ և Դոնոստիա քաղաքների միջև ստորագրվել է Համագործակցության համաձայնագիր։ Համաձայնագրում ընդգծված է, որ կողմերը հիմնվելով հավասարության և փոխշահավետության սկզբունքների վրա իրականացնելու են փորձի փոխանակում և համագործակցություն տարբեր բնագավառներում։
Երկու քաղաքների միջև ստորագրված համաձայնագրում նշվում է, որ համաձայնագրի շրջանակներում երկու քաղաքները և նրանց համապատասխան կառույցները պարբերաբար շփումներ են ունենալու՝ քննարկելու համագործակցության խնդիրները, ինչպես նաև փոխադարձ հետաքրքրություն ներկայացնող այլ հարցեր։
Նույն օրը Արցախի Հանրապետության ԱԳ նախարարը հանդիպել է նաև Տոլոսա քաղաքի քաղաքապետ Իբայ Իրիարտե Սան Վիսենթեյի հետ։ Հանդիպման ընթացքում կողմերը մտքեր են փոխանակել Արցախի և Բասկերի Երկրի միջև մի շարք ոլորտներում ապակենտրոնացված համագործակցության հաստատման հեռանկարների շուրջ։ Այս համատեքստում անդրադարձ է կատարվել Տոլոսայի և Արցախի քաղաքների միջև կապերի հաստատման հնարավորությանը։ Ձեռք են բերվել գործնական պայմանավորվածություններ։
Այս մասին հաղորդում է Արցախի Հանրապետության արտաքին գործերի նախարարության մամլո ծառայությունը:
Դոնոստիա (Սան Սեբաստիան) քաղաքը Բասկերի երկրի Գիպուսկոա նահանգի մայրաքաղաքն է, երկրի ամենահայտնի զբոսաշրջային կենտրոններից մեկն է։ Հայտնի է ֆիլմերի միջազգային փառատոնով։ Դոնոստիա քաղաքը Եվրամիության կողմից հայտարարվել է 2016 թ. Եվրոպայի մշակութային մայրաքաղաք:
Տոլոսա քաղաքը գտնվում է Բասկերի Երկրի Գիպուսկոա նահանգում: Հիմնվել է 1256 թվականին։ Ունի 15 հազար բնակիչ։ Բասկերի Երկրի կարևորագույն պատմամշակութային կենտրոններից մեկն է։ 19-րդ դարում եղել է Բասկերի Երկրի մայրաքաղաքը։