ԼՂՀ ԱԺ պատգամավորները հանդիպել են «Թուֆենկյան» բարեգործական հիմնադրամի ներկայացուցիչների հետ
ԼՂՀ ԱԺ <<Դաշնակցություն>> խմբակցության նախաձեռնությամբ երեկ՝ օգոստոսի 30-ին, խորհրդարանի հինգ խմբակցության պատգամավորները հանդիպել են <<Թուֆենկյան>> բարեգործական հիմնադրամի ներկայացուցիչների եւ Արցախում գտնվող նրանց գործընկերների հետ։
Բացման խոսքով հանդես է եկել ՀՅԴ Արցախի ԿԿ ներկայացուցիչ, ԼՂՀ ԱԺ <<Դաշնակցություն>> խմբակցության ղեկավար Դ.Իշխանյանը, ով կարևորել է նման հանդիպումների կազմակերպումը:
<<Մենք այս նախաձեռնությամբ նպատակ ունեինք մտքերի փոխանակության արդյունքում նոր լիցք հաղորդելու 25 տարիների մեր միասնական աշխատանքին>>,- նշել է <<Դաշնակցություն>> խմբակցության ղեկավարը:
Հանդիպման սկզբում պատգամավորները ներկայացրել են Արցախի 25 տարիների անցած ուղին:
<<Ինձ համար մեծ պատիվ է լինել այսօր այստեղ, որովհետեւ դուք ամեն օր պայքարում եք հանուն ազատության, հանուն ժողովրդավարության եւ հանուն Արցախի բարգավաճման,- նշել է Ամերիկահայ հայտնի գրող, 18 վեպերի հեղինակ Քրիս Բոհջալյանը եւ շեշտել,- Արցախը սփյուռքահայերիս սրտում եւ հոգում է: Մենք ձեր թիկունքում ենք>>:
Հիմնադրամի հոգաբարձու Անդրանիկ Գասպարյանի խոսքով՝ հինգօրյա խմբային այցելությունը ծառայում է մի քանի նպատակների, սակայն ամենակարեւորը, նրա կարծիքով, այցելություններն են Արցախի ազատագրված շրջաններ։ << Մենք ծանոթացանք տեղի հիմնախդիրներին, որոնք եւ հիմք կհանդիսանան նոր ծրագրեր իրականացնելու համար>>,- նշել է նա։
<<Թուֆենկյան>> բարեգործական հիմնադրամն իր զանազան ծրագրերով մեծ աշխատանքներ է իրականացնում Լեռնային Ղարաբաղի Հանրապետության ազատագրված տարածքներում: Հիմնադրամի ներկայացուցիչների խոսքով ՝ այսօր հիմնադրամը, առաջին հերթին, պետք է աշխատի տնտեսական զարգացման տեմպերն արագացնելու ուղղությամբ:
Անդրադառնալով սոցիալական ցանցերում շրջանառող այն թյուր տեսակետին, որ իբր ՀՀ եւ Արցախի իշխանությունները պատրաստ են փոխզիջման, հանդիպմանը ներկա վարչապետի մամուլի խոսնակ Արտակ Բեգլարյանը նշել է, որ <<Թուֆենկյան>> բարեգործական հիմնադրամի ծրագրերն ազատագրված տարածքներում լրացուցիչ երաշխիքներ են, որ ոչ մի զիջում չի լինելու։
Հանդիպումը շարունակվել է հարց ու պատասխանի ձեւաչափով: Ներկա բոլոր քաղաքական ուժերի ներկայացուցիչներն իրենց կուսակցությունների տեսակետներն ու դիրքորոշումներն են ներկայացրել Արցախի հիմնահարցի, տնտեսական զարգացման ուղիների եւ մի շարք այլ հարցերի առնչությամբ: