Լիտվան պաշտոնապես հայտարարել է ԼՂՀ-ի հետ բարեկամության խմբի ստեղծման մասին

Խմբի անդամների ցուցակը հրապարակվել է երկրի արտաքին քաղաքական գերատեսչության պաշտոնական կայքում: Այն, սակայն, վերջնական չէ: Նիստը նախագահող Վիտաուտաս Գապշիսը խմբի ստեղծման մասին հայտարարությունը կարդալուց հետո ցանկացողներին կոչ է արել միանալ, իսկ այնուհետեւ հայտարարել է խմբի առաջին նիստի մասին:

 

 

 

 

Լիտվայի ներքին գործերի նախկին նախարար Աուդրոնյուս Աջուբալիսը հայտարարել է, որ նման խմբի ստեղծումը կվնասի Լիտվայի արտաքին քաղաքականչությանը: Նա հիշեցրել է, որ Լիտվայում Ադրբեջանի դեսպանը երկրի ԱԳ նախարարությանը բողոքի նոտա է հղել, որում նշված է, որ սա բացասական ազդեցություն կունենա երկկողմ հարաբերությունների վրա: Նրա համոզմամբ` Սեյմը նման խմբեր է ստեղծում միայն միջազգայնորեն ճանաչված պետությունների հետ։

 

 

 

 

Իսկ խմբի հիմնադիր անդամներից Դանգուտե Միկուտենեն ի պատասխան նշել է, որ Սեյմում կան նաեւ այլ խմբեր՝ չճանաչված տարածքների հետ համագործակցության համար։ «Լիտվան դեմոկրատական պետություն է, եւ Սեյմի անդամներն ունեն ազատ մանդատ։ Նրանք կարող են բարեկամանալ այլ երկրների, այդ թվում՝ պաշտոնապես չճանաչվածների խորհրդարանների հետ։ Գուցե Ձեզ համար ընթերցեմ նման խմբերի ցանկը, որի ներքո ստորագրել են նաեւ Ձեր խմբակցության անդամները՝ Կուբա, Թայվան, Չեչնիա, Տիբեթ»,- ասել է Միկուտենեն։