Թե ինչ եղավ, երբ Տիգրանիկը Ռուսաստան թռավ
Փոքրիկ գյուղում Տիգրանիկին գիտեին բոլորը: Մի բուռ մարդիկ են, ամոթ էլ չէ՞, որ իրար չճանաչեն: Մի ժամանակ գյուղը մեծ էր, բնակչությունը` շատ: Բայց ժամանակի ու բարքերի բերումով փոքրացավ, դարձավ անմխիթար, երիտասարդները չվեցին դեպի տաք ռուսաստաններ: Հիմա դատարկ տների թիվն ավելի շատ է, քան իրենք` բնակիչները:
Տիգրանիկը միջակ սովորող էր, հատուկ շնորհքով ու գիտելիքներով չէր փայլում դպրոցում, թեև մայրը ծնողական ժողովների ժամանակ անընդհատ բողոքում էր. «Սովորում է, չի սովորում` 3-4 եք դնում, բա երեխուն էդպես կկոտրե՞ն, երեխուն պիտի թև տաք…»: Դպրոցում արդեն անգիր գիտեին այդ բողոքը, և ծնողական ամեն մի ժողովի գնալուց առաջ դասղեկն ինքնաբերաբար ծանոթ երգի պես քթի տակ կրկնում էր այն:
Այդպես էլ դպրոցում Տիգրանիկին ոչ ոք թև չտվեց, բայց արի ու տես, որ մի օր նա մեծացավ, ինքն իրեն թև առավ ու թռավ Ռուսաստան:
— Գնացել է փող աշխատելու, ուզում է գա հայրական տունը շենացնի, հրե՜ն տանս պատը քանդվում է, ո՞վ պիտի դրա հոգսը քաշի: Խեղճ երեխաս էստեղ կարգին աշխատանք չգտավ, գնաց ընկավ Ռուսաստանի ձորերը, — ախ ու վիշ էր անում մայրը:
— Հը, Տիգրանիկը ո՞նց է, ձեն-ձուն չի հանում, հարմարվե՞ց Ռուսաստանում,- որոշ ժամանակ անց հարցրեց հարևան Սաթիկը:
— Է՜, Տիգո, ի~նչ Տիգո, ո՞վ կարող է հիմա Տիգոյիս հետ ոտք չափի: Փողին փող չի ասում, գալոստիկը վզին, ջիպը տակին, տուն-տնամեջն էլ երկու անգամ չես նայի:
— Բո՜, Էդ ի՞նչ գործով է զբաղվում մեր Տիգրանիկը, որ էդպես Տիգո է դառել:
— Ես ի՞նչ իմանամ, իմ ի՞նչ գործն է, կարևորը՝ որ ոտքը պնդացրել է արդեն:
— Հա՜, վերջում էլ մի ռուսի կհանդիպի, կմնա էնտեղ, քեզ էլ կտանի:
— Չէ մի չէ, խի՞ ես մեռած եմ, որ տղաս ռուս հարս բերի տունս: Իմ հացը խլեբ չի դառնա՝ լավ իմացիր
Այսպես Տիգրանիկը հաստատվեց Ռուսաստանում: Տաս տարի գյուղի երես չտեսավ: Ձմռան ամիսներին մայրը գնում էր տեսակցության և վերադառնում` գովեստի պարկը շալակին. «Տիգոյիս պես չկա՝ գալոստիկը վզին, ջիպը տակին…»:
Մի օր հարևանուհուն ասաց.
— Երկու օրից Տիգոս գալիս է, հարսիս բերում է ծանոթացնի, էս ամառ շախով-շուխով հարսանիք կանենք:
— Մալադեց տղա, բա աղջիկը ո՞ր կողմերից է:
— Էնտեղից է:
— Էնտեղի հա՞յ է:
— Բայց դա ի՞նչ կապ ունի՝ հա՞յ է, թե հայ չէ: Ես հո հետամնաց չեմ, որ նման հարցեր տամ. կարևորը՝ իրար սիրում են:
— Հողեմ գլուխդ, դե կգնաս խլեբ ուտես,- քթի տակ ասաց հարևանը:
— Ի՞նչ:
— Ոչ մի բան, ասում եմ՝ երևի գյուղովի մեծ հարսանիք կանեք:
— Ի՞նչ գյուղ, Ռուսատանում ենք անելու, Ռուսատանում:
— Ուզու՞մ ես ասել, որ մենք հետամնաց մարդիկ ենք, հա՞:
— Չէ, բայց հո ռուսի պես զարգացած չեք: Տիգոյիս հարսանիքին էնքան գալոստիկով մարդիկ են գալու, որ չեղած: Ամո՞թ չի էդ մարդկանց ասենք, թե գյուղում է Տիգոն պսակվում:
Երկու օրից Տիգրանիկ-Տիգոն եկավ գյուղ: Սև ջիպով անցավ գյուղամիջով և գլխով բարևեց կանգնած մարդկանց:
— Էս Տիգրանիկը չի՞: Բա խի՞ մեքենայից չիջավ, 10 տարի դաս եմ տվել, — ասաց մաթեմատիկայի ուսուցիչը վիրավորված:
Մայրը տղայի պատվին ժենգյալով հաց էր թխել: Երբ սեղան նստեցին, հյուսիսային հարսնացուն ասաց.
—1 Тигран, что это?
—2 Это… зеленный хлеб, — այսպես թարգմանեց Տիգոն, ում համար արդեն ամեն բան կանաչ էր:
— 3 Уфф, не хочу, давай пиццу закажем, — հարսը քիթը կնճռոտեց:
Տիգրանիկը քահ-քահ ծիծաղեց:
— 4 Օքեյ, օքեյ, զակաժեմ, — ասաց անգլոռուսախոս դարձած Տիգոն:
Հաջորդ օրը առավոտյան մայրը արդուկեց տղայի կոստյումը, որ հագնի ու իջնի գյուղամեջ:
— Մամ, գալոստիկս չե՞ս կապի, — կոստյումը հագնելով` ասաց տղան:
— Վայ, բալա ջան, ես ո՞ր օրվա գալոստիկ կապող եմ, հարսիկդ թող կապի:
— Չի կարողանում, մամ… Հիմա ի՞նչ անեմ, առանց գալոստիկ իջնեմ գյուղամեջ, մարդիկ ի՞նչ կասեն:
— Ամոթ է, ամոթ է: Սպասի, գնամ հարևան Սերժիկին կանչեմ՝ գա կապի: Գյուղապետարանում է աշխատում, գուցե իմանա՞ ձեւը:
Սերժիկը գլուխն օրորեց ու ասաց, որ կյանքում «էդ գործն արած չկա»:
— Պահոոոո, ուրիշի կանչի,- բողոքեց Տիգոն:
— Սպասի՝ գնամ Սիրուշին կանչեմ. չորս տղա է մեծացրել, գալոստիկ կապած կլինի:
Էն, որ Սիրուշը 4 տղա էր մեծացրել, դա ճիշտ էր, բայց, որ գալոստիկ կապել չգիտեր, էդ ավելի ճիշտ էր:
— Բա ի՞նչ անեմ, — նեղսրտվեց մայրը:
-Խի՞ ես սրտնեղվում, — հուսադրեց Սիրուշը, — Առստամյանին խնդրի՝ գա կապի. գյուղապետ մարդ է, ամեն օր գալոստիկով է գործի գնում:
— Վայ, ես քո արևը կծեմ, ճիշտ ես ասում:
Րոպե չանցած՝ Առստամյանը ներկայացավ:
Տիգոյի գալոստիկի հարցը համարվեց լուծված: Առստամյանն իրենից գոհ-գոհ հարցրեց.
— Տղա ջան, Ռուսաստանում ի՞նչ գործի ես:
-Սեփական բիզնես ունեմ, դաչա, մեքենա, աշխատողներ…
— Հա~…
— Պարոն Առստամյան, ինչպե՞ս դուրս գամ ձեր լավության տակից: Ինչո՞վ կարող եմ օգտակար լինել գյուղին:
— Ապրես, շատ ապրես, որ էդքան շնորհք ունես: Դե, գյուղում մեծացած երեխա ես, պիտի գյուղի հոգսերին տեղյակ լինես: Ինչպես տեսնում ես`մանկապարտեզ չունի գյուղը, ակումբի շենքը փլման ենթակա է, մի նորմալ բուժկետ չունենք և նման այլ խնդիրներ, որոնց լուծումը ակնկալում է քեզպեսների աջակցությունը:
— Ես մի բան կանեմ, անպայման գյուղի համար մի հովանավոր կգտնեմ, հանգիստ կացեք:
— Ապրես, տղա ջան, շատ ապրես:
— Դուք էլ ապրեք, պարոն գյուղապետ, որ դուք չլինեիք, ո՞վ պիտի Տիգոյիս գալոստիկը կապեր. երեսներս պարզ արիք, — ժպիտը դեմքին ավելացրեց մայրը:
Առստամյանի հեռանալուց հետո մայրը Տիգոյին զգուշացրեց:
— Գյուղի մարդկանց շատ գլուխ չդնես: Ականջիդ մեկը խուլ պահիր: Գյուղացի մարդիկ են, ի՞նչ գիտեն, թե ինչ է կատարվում ռուսաստաններում: Դրանք մենակ ուզողություն անել գիտեն:
— Գիտեն, թե փողը մենակ ակումբ-մանկապարտեզ շինելու համար է, — Տիգոն նայեց հայելու մեջ եւ հիացավ ինքն իր տեսքով:
…Սա Տիգրանիկի առաջին այցն էր հարազատ գյուղ: Ապա այն դարձավ վերջինը: Դրանից հետո գյուղացիք Տիգոյի երեսը չտեսան: Երկու տարի հետո մայրն էլ տեղափոխվեց Ռուսաստան: Հիմա հայրական տունը դատարկ է, հարևան Վալոդն է տանը նայում: Մի անգամ հեռախոսով կապվել էր Տիգոյի հետ ու հարցրել.
— Բալա ջան, բա հայրական տանդ պատը փլվել է, ի՞նչ անենք. կու՞զես մի քիչ փող ուղարկի, մի մարդ վարձեմ՝ շինի, ափսոս է:
— Չէ, դյադ Վալոդ, ինչի՞ս են պետք էդ պատերը, տունը քեզ փեշքեշ, կուզես պահի, կուզես`քանդի-ծախի, կուզես`գոմ շինիր:
— Լավ, Տիգո ջան, դե որ էդպես է, ուրեմն կով-մով կպահեմ մեջը:
— Ոնց սիրտդ տա, Վալոդ դյադ, — Տիգոյի ձայնը մարեց հեռախոսում…
Հերմինե Ավագյան
1 Տիգրան, ի՞նչ է սա
2 Դա… Կանաչ հաց է,
3 Ուֆֆ, չեմ ուզում, արի պիցցա պատվիրենք,
4 Օկ, Օկ, կպատվիրենք…..